திருச்சி, 24 மே (ஹி.ச.)

திருச்சி அரசு மருத்துவமனையில் தவறான சிகிச்சையால் செவிலியர் மாணவி பலியானார். அவரது இறப்புக்கு காரணமான மருத்துவர்களை கைது செய்ய உரிய நடவடிக்கை எடுக்க வலியுறுத்தி சக மாணவிகள் கண்ணீர் மல்க சாலை மறியலில் ஈடுபட்டு, திருச்சி மாவட்ட ஆட்சியர் அலுவலகத்தை முற்றுகையிட்டனர்.

நேற்று மாலை வரை போராட்டத்தில் ஈடுபட்டவர்களிடம் திருச்சி மாநகர காவல் ஆணையர் காமினி பேச்சுவார்த்தை நடத்தினர்.

அப்போது, பாதிக்கப்பட்ட மாணவியின் குடும்பத்தினருக்கு அரசு வேலை வழங்க வேண்டும் என்ற கோரிக்கையை முன் வைத்தனர்.

இந்த சமயத்தில் சென்னையில் இருந்து மருத்துவ குழுவினர் அங்கு வந்து மாணவிகளிடம், விசாரணையை தொடங்கி விட்டோம். 3 நாளில் அறிக்கை கொடுப்போம் என்று தெரிவித்தனர்.

இதையடுத்து, போராட்டம் தற்காலிகமாக கைவிடப்பட்டது. மேலும், மாணவிகள் 10 பேரை திருச்சி மாவட்ட ஆட்சியர் சரவணனை சந்திக்க போலீசார் அழைத்து சென்றனர். சுமார் 12 மணி நேரம் போராட்டம் நடந்தது குறிப்பிடத்தக்கது.

உயிரிழந்த மாணவியின் இறுதிச் சடங்கில் கலந்துகொள்வதற்கு ஏதுவாக, போராட்டத்தில் ஈடுபட்ட மாணவிகளுக்கு மூன்று பேருந்துகள் ஏற்பாடு செய்யப்பட்டுள்ளன.

மாணவியின் மரணத்திற்கு நீதி கோரியும், உரிய விசாரணை நடத்த வலியுறுத்தியும் நடைபெற்று வந்த போராட்டம், இதனையடுத்து இரண்டு நாட்களுக்கு தற்காலிகமாக ஒத்திவைக்கப்பட்டுள்ளது.

மாணவியின் மரணம் தொடர்பாக உண்மைகளை கண்டறிய அரசு தரப்பில் விசாரணைக் குழு ஒன்று அமைக்கப்பட்டுள்ளது. அந்தக் குழுவின் அறிக்கை கிடைத்தவுடன், அதன் அடிப்படையில் உரிய நடவடிக்கை எடுக்கப்படும் என அதிகாரிகள் தரப்பில் மாணவிகளுக்கு உறுதி அளிக்கப்பட்டுள்ளது.

இந்த உறுதிமொழியை ஏற்றுக்கொண்டே மாணவிகள் போராட்டத்தை ஒத்திவைக்க சம்மதித்துள்ளனர்.

அதேநேரம், விசாரணைக் குழுவின் அறிக்கையின் அடிப்படையில் உரிய நடவடிக்கை எடுக்கப்படவில்லை என்றால், எங்களது போராட்டம் மீண்டும் தீவிரமாக தொடரும் என்று போராட்டத்தில் ஈடுபட்ட மாணவிகள் திட்டவட்டமாக தெரிவித்துள்ளனர்.

மாணவியின் மரணம் தொடர்பாக நிலவும் சந்தேகங்களுக்கு விடை கிடைக்கும் வரையிலும், குற்றவாளிகள் மீது கடும் நடவடிக்கை எடுக்கப்படும் வரையிலும் தங்களது போராட்டம் ஓயாது எனவும் அவர்கள் வலியுறுத்தியுள்ளனர்.

தற்போது நிலைமை கட்டுக்குள் இருப்பதாகவும், விசாரணை விரைந்து முடிக்கப்பட்டு நீதி நிலைநாட்டப்படும் என்றும் காவல்துறை வட்டாரங்கள் தெரிவிக்கின்றன.

Hindusthan Samachar / vidya.b