காஷ்மீர், 09 ஜூன் (ஹி.ச)

காஷ்மீர் மற்றும் லடாக் இடையே அனைத்து காலநிலைகளிலும் தடையற்ற இணைப்பை வழங்கும் நோக்கில் ஜோஜிலா சுரங்கப்பாதை வடிவமைக்கப்பட்டுள்ளது.

13.153 கிலோமீட்டர் நீளமுள்ள ஜோஜிலா சுரங்கப்பாதை, உலகின் மிக நீளமான ஒற்றைக் குழாய் இருவழி சாலை சுரங்கப்பாதையாகும்.

ஜம்மு காஷ்மீர் மற்றும் லடாக் யூனியன் பிரதேசங்களில், பால்டால் (சோன்மார்க்) மற்றும் மீனாமார்க் (திராஸ் மற்றும் கார்கில்) இடையே ஜோஜிலா பகுதியில் அமைந்துள்ள இந்த சுரங்கப்பாதை, இந்தியாவின் மிகவும் சவாலான இமயமலைப் பாதைகளில் ஒன்றுக்கு அனைத்து காலநிலைகளிலும் இணைப்பை வழங்கும் நோக்கம் கொண்டது.

கடும் பனிப்பொழிவு, பனிச்சரிவுகள் மற்றும் கடுமையான வானிலை காரணமாக இந்த வழித்தடம் ஆண்டுதோறும் பல மாதங்களுக்கு துண்டிக்கப்படுகிறது.

சுமார் 11,578 அடி உயரத்தில் அமைந்துள்ள இந்த சுரங்கப்பாதை, ரூ.6,500 கோடி செலவில் கட்டப்பட்டு வருகிறது.

திட்டத்தை செயல்படுத்தும் மேகா இன்ஜினியரிங் & இன்ஃப்ராஸ்ட்ரக்சர்ஸ் லிமிடெட் (MEIL) நிறுவனத்தின்படி, இந்த சுரங்கப்பாதை இந்திய உள்கட்டமைப்பு துறையில் மிக முக்கியமான பொறியியல் சாதனைகளில் ஒன்றாகும்.

இந்த சுரங்கப்பாதையின் இறுதிக்கட்ட பாறைச் சுவர் தோண்டப்படுவதைக் குறிக்கும் முக்கிய நிகழ்வு இன்று நடைபெறவுள்ளது.

ஜோஜிலா சுரங்கப்பாதையின் துளையிடும் நிகழ்வில் இன்று மத்திய சாலை போக்குவரத்து மற்றும் நெடுஞ்சாலைகள் துறை அமைச்சர் நிதின் கட்கரி, பங்கேற்கிறார்.

இந்த இறுதிக்கட்ட துளையிடல், இந்திய உள்கட்டமைப்பு வளர்ச்சியில் ஒரு வரலாற்று மைல்கல்லாக அமையும். இதற்காக அப்பகுதியில் விரிவான பாதுகாப்பு ஏற்பாடுகள் செய்யப்பட்டுள்ளன.

Hindusthan Samachar / vidya.b