கர்னூல், 29 நவம்பர் (ஹி.ச.)

ஆந்திராவின் கர்னூல் மாவட்டத்தில் உள்ள கோடேகல் கிராமத்தில், இரண்டு கார்கள் இன்று (நவ 29) அதிகாலை 4.30 மணி அளவில் நேருக்கு நேர் மோதி விபத்து ஏற்பட்டது.

தகவல் அறிந்து சம்பவ இடத்திற்கு விரைந்த போலீசார், உள்ளூர் மக்கள் உதவியுடன் நீண்ட நேரம் போராடி மீட்பு பணி மேற்கொண்டனர். இந்த விபத்தில், 2 குழந்தைகள் உள்பட 5 பேர் சம்பவ இடத்திலேயே உயிரிழந்தனர். இவர்கள் கர்நாடகா மாநிலத்தை சேர்ந்தவர்கள் என போலீசாரின் விசாரணையில் தெரியவந்துள்ளது.

விபத்தில் இறந்த வெங்கடேஷப்பா (76), சதீஷ்குமார் (34), அவரது மனைவி மீனாட்சி (26) மற்றும் இரண்டு குழந்தைகள் பனித் கவுடா (6) ரித்விக் (40) ஆகிய 5 பேரின் உடல் அடையாளம் காணப்பட்டுள்ளதாக போலீசார் கூறியுள்ளனர்.

இந்த விபத்தில் மேலும் இரண்டு பேர் காயம் அடைந்தனர். இவர்கள் சிகிச்சைக்காக மருத்துவமனையில் அனுமதிக்கப்பட்டு உள்ளனர். அவர்களில் ஒருவரின் நிலை கவலைக்கிடமாக உள்ளது.

இதனால் பலி எண்ணிக்கை அதிகரிக்கும் என அஞ்சப்படுகிறது. இந்த விபத்துக்கான காரணம் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.

Hindusthan Samachar / vidya.b