சென்னை, 29 நவம்பர் (ஹி.ச)

மயிலாப்பூர் கபாலீஸ்வரர் கோவில் அறுபத்து மூவர் உலா விழாவில், அன்னதானம் வழங்க துவங்கப்பட்ட அறக்கட்டளை சொத்தை மீட்கக் கோரிய மனு மீது உரிய நடவடிக்கை எடுக்கும்படி, இந்து சமய அறநிலையத் துறை இணை ஆணையருக்கு சென்னை உயர்நீதிமன்றம் உத்தரவிட்டுள்ளது.

சென்னை மயிலாப்பூர் கபாலீசுவரர் கோவில் பிரம்மோற்சவத்தின் போது, 63 நாயன்மார்கள் விழாவில் கலந்துகொள்ளும் பக்தர்களுக்கு உணவு அளிப்பதற்காக, 1834 ம் ஆண்டு ரொட்டிக்காரச் சத்திரம் என்ற அறக்கட்டளை அமைக்கப்பட்டிருந்தது.

அந்த அறக்கட்டளைக்கு சொந்தமாக கபாலீஸ்வரர் கோவில் தெற்கு மாட வீதியில், 9,198 சதுர அடி பரப்பில் நிலம் மற்றும் கட்டிடம் உள்ளது. இதில், ஒரு திருமண மண்டபமும், மூன்று கடைகளும் இடம்பெற்றுள்ளன.

அந்த நிலத்தை, பயன்படுத்தி வந்த ஜெயசிங்க் என்பவர், அதனை தனது மனைவி, மகன்களுக்கு எழுதி கொடுத்துள்ளார்.

சட்டவிரோதமாக பத்திரப்பதிவு செய்யப்பட்ட அறக்கட்டளைக்கு சொந்தமான அந்த சொத்தில், ஜெயசிங்-கின் குடும்பத்தினர் கட்டுமானங்கள் மேற்கொள்ள நடவடிக்கைகள் எடுத்து வருவதால், அந்த நிலத்தை மீட்கக் கோரியும், ஆக்கிரமிப்பாளர்கள் மீது நடவடிக்கை எடுக்கக் கோரியும், சென்னை ஆர்.ஏ.புரத்தை சேர்ந்த விவேக் என்பவர் சென்னை உயர்நீதிமன்றத்தில் வழக்கு தாக்கல் செய்துள்ளார்.

இந்த வழக்கு நீதிபதி பாலாஜி முன்பு விசாரணைக்கு வந்தபோது, மனுதாரர் தரப்பில் ஆஜரான வழக்கறிஞர் D.ஹரிஷ்குமார், பக்தர்கள் நலனுக்காக ஒதுக்கப்பட்ட இந்த சொத்தை ஆக்கிரமித்துள்ளது சட்டவிரோதமானது என்றும், ஆக்கிரமிப்பாளர்களை அகற்றி சொத்தை மீட்க உத்தரவிட வேண்டுமெனவும், இதுசம்பந்தமாக ஏற்கனவே அரசுக்கு மனு அளித்துள்ளதாகவும் தெரிவித்தார்.

இந்த வாதங்களை கேட்ட நீதிபதி, இதுதொடர்பாக, ஒரு வாரத்தில் விரிவான மனுவை இணை ஆணையருக்கு அளிக்கும்படி மனுதாரருக்கு உத்தரவிட்டார்.

மேலும், மனுதாரரின் மனுவின் அடிப்படையில் விசாரணை நடத்தி, உரிய நடவடிக்கை எடுக்கும்படி அறநிலையத்துறை இணை ஆணையருக்கு உத்தரவிட்டுள்ளார்.

Hindusthan Samachar / P YUVARAJ