சென்னை, 29 நவம்பர் (ஹி.ச.)

புதிய உலகில் வாழக்கூடிய பெரும்பூனை இனம் ஜாகுவார் (Jaguar) ஆகும். இது பூனைக் குடும்பத்தில் சிங்கம் மற்றும் புலிக்கு அடுத்தபடியாக மூன்றாவது பெரிய விலங்காக உள்ளது. இது சிறுத்தைகளை விட பெரியது.

இது இந்தியா மற்றும் ஆசியப் பகுதிகளில் இல்லை. ஆகவே தமிழில் இதற்குத் தனியாகப் பெயர் கிடையாது. இருப்பினும் வலியச்சிறுத்தை என அழைக்கப்படுகிறது.

ஜாகுவர்களைப் பாதுகாக்கும் நோக்கத்துடன் நவம்பர் 29 - சர்வதேச ஜாகுவார் தினம்

(November 29- International Jaguar Day) ஆக கடைபிடிக்கப்படுகிறது.

அமெரிக்கக் கண்டத்தைப் பூர்வீகமாகக் கொண்ட விலங்கு ஜாகுவார் ஆகும். மெக்சிகோ முதல் அர்ஜென்டினா வரை 18 நாடுகளை உள்ளடக்கிய இலத்தீன் அமெரிக்காவில் ஜாகுவார் காணப்படுகிறது. இந்த இனம் 1900 ஆம் ஆண்டுகளில் இருந்து ஐக்கிய அமெரிக்க மாநிலங்களில் முற்றிலுமாக அழிந்துவிட்டது.

இதன் விருப்பமான வாழ்விடங்கள் பொதுவாக மழைக்காடுகள், சதுப்பு நிலங்கள் மற்றும் மரங்கள் நிறைந்த பகுதிகளாகும். இருப்பினும் புதர்களிலும், பாலைவனங்களிலும் வாழ்கின்றன. தற்போது 64,000 ஜாகுவார்கள் இருப்பதாகக் கணக்கிடப்பட்டுள்ளன. இந்த எண்ணிக்கையில் 89 சதவீத ஜாகுவார் அமேசான் நதிப் படுக்கையில் வாழ்கின்றன.

இதன் அறிவியல் பெயர் பாந்தெரா ஓன்கா (Panthera onca) என்பதாகும். இதில் 3 துணை இனங்கள் மட்டுமே அங்கீகரிக்கப்பட்டுள்ளது. இதன் உடல் ஆரஞ்சு முதல் பழுப்பு நிறத்தில் காணப்படும். இதில் ரொசெட்டுகள் எனப்படும் ரோஜா போன்ற குறியீடுகள் உள்ளன. இதன் மையத்தில் ஒரு கருப்பு புள்ளியும் இருக்கும். இது புதர் மற்றும் புற்களில் மறைவதற்கு உதவுகிறது.

ஆண் ஜாகுவார் பெண் ஜாகுவார்களை விட பெரியது. இது வால் உள்பட 5.6 அடி முதல் 9 அடி நீளம் வரை இருக்கும். இதன் உயரம் தோள்பட்டை வரை 68 முதல் 75 சென்டிமீட்டர் இருக்கும். இதன் உடல் எடை 68 முதல் 90 கிலோ வரை காணப்படும். தென் அமெரிக்க ஜாகுவார் மத்திய அமெரிக்காவை விட பெரியது. குறிப்பாக வெனிசுலா மற்றும் பிரேசிலில் உள்ள ஜாகுவார் மிகவும் பெரியது.

இது நீரில் நன்றாக நீந்தும். இது பனாமா கால்வாயை நீந்துவதும் அறியப்பட்டுள்ளது. இது வேகமாக ஓடக்கூடிய விலங்கு. குறுகிய தூரத்திற்கு மணிக்கு 80 கிலோமீட்டர் வேகத்தில் ஓடும். இது பெரும்பாலும் இரவு மற்றும் அந்தி நேரத்தில் சுறுசுறுப்பாக இருக்கும்.

இது ஒரு மிகப் பெரிய மாமிச உண்ணி. இது இரையைத் துரத்துவதை விட பதுங்கியிருந்து தாக்கும். ஒரே பாய்ச்சலில் விலங்கைக் கடித்துக் கொன்றுவிடும். இதன் கடிதிறன் மிகவும் வலிமை வாய்ந்தது. பாலூட்டிகளின் மண்டை ஓட்டை துளைத்து, மூளைக்கு அபாயகரமான அடியைத் தரும். மான்கள், பறவைகள், முதலைகள், ஆமைகள் மற்றும் மீன்களையும் வேட்டையாடும்.

மெலனின் நிற குறைபாட்டால் கருப்பு நிற ஜாகுவார் பிறக்கிறது. பொதுவாக இது கருப்பு சிறுத்தை என அழைக்கப்படுகிறது. இது மிகவும் அரிதானது. கருப்பு ஜாகுவார் மத்திய மற்றும் தென் அமெரிக்காவில் பதிவு செய்யப்பட்டுள்ளது.

ஜாகுவாரில் உள்ள மெலனிச நிறமியில் மெலனோகாட்டின்- 1 ஏற்பி என்பது மரபணுவில் நீக்கப்படுவதால் கருப்பு நிறம் ஏற்படுகிறது. இந்தக் கருப்பு ஜாகுவார் பகல் நேரத்தில் சுறுசுறுப்பாக இருக்கும்.

ஜாகுவார் வாழும் பகுதியில் தினமும் அச்சுறுத்தலைச் சந்தித்து வருகிறது. ஜாகுவர்களைப் பாதுகாக்கும் நோக்கத்துடன் ஜாகுவார் 2030 மன்றம் (Jaguar 2030 Forum) உருவாக்கப்பட்டது. இதன் 14 நாடுகளின் பிரதிநிதிகள் நியூயார்க்கில் உள்ள ஐக்கிய நாடுகளின் தலைமையகத்தில் 2018 ஆம் ஆண்டு மார்ச் மாதத்தில் கூடினர். இந்த மன்றம் ஜாகுவார் 2030 என்ற அறிக்கையை உருவாக்கியது.

இந்த மன்றம் சர்வதேச ஜாக்குவார் தினத்தை முன்மொழிந்தது. இது சர்வதேச அளவில் ஜாகுவார் பாதுகாப்பிற்கான வழிமுறைகளையும் உருவாக்கியது. மேலும் நவம்பர் 29ஐ சர்வதேச ஜாகுவார் தினம் (International Jaguar Day) ஆக அறிவித்தது. 2018 ஆம் ஆண்டு முதல் இந்த தினம் கடைபிடிக்கப்படுகிறது.

இது சர்வதேச அளவில் கடைபிடிக்கப்படும் ஒரு தினமாகும். ஜாகுவார் விலங்கு வாழாத நாடுகளிலும் இத்தினம் கடைபிடிக்கப்படுகிறது. இந்தியாவில் உள்ள தேசிய விலங்கியல் பூங்காக்களிலும் இந்த தினம் கொண்டாடப்படுகிறது.

இதன் வாழ்விடங்களைப் பாதுகாப்பது பற்றிய அவசியத்தைக் கவனத்தில் கொள்ள வேண்டும்.

இந்த விலங்கை வேட்டையாடுவது என்பது சட்ட விரோதமானது ஆகும். ஜாக்குவார் பற்றிய விழிப்புணர்வு சார்ந்த ஆவணப் படங்களும் வெளிவந்துள்ளன.

ஆகவே இந்த விலங்கைப் பாதுகாக்கும் பொறுப்பு தற்போது மனிதர்களிடம் மட்டுமே உள்ளது.

Hindusthan Samachar / JANAKI RAM