திருவள்ளூர், 30 அக்டோபர் (ஹி.ச.)

ஆந்திர மாநிலம் திருப்பதி மாவட்டம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தில் உள்ள 2-வது ஏவுதளத்தில் இருந்து ‘எல்.வி.எம்-3' என்ற ராக்கெட் மூலம் ஜிசாட்-7 என்று அழைக்கப்படும் சி.எம்.எஸ்-03 செயற்கைக்கோளை வருகிற 2-ந்தேதி (ஞாயிற்றுக்கிழமை) மாலை 5.26 மணிக்கு விண்ணில் ஏவுவதற்கான இறுதிக்கட்ட பணிகளில் இஸ்ரோ ஈடுபட்டுள்ளது.

சி.எம்.எஸ்-03 செயற்கைக்கோள் விண்ணில் ஏவப்படுவதற்கான ‘கவுண்ட்டவுன்’ 1-ந்தேதி மாலை 5.26 மணி அளவில் தொடங்க இருக்கிறது.

ராக்கெட் விண்ணில் ஏவப்படுவதை பார்வையிடுவதற்காக ஸ்ரீஹரிகோட்டாவில் 10 ஆயிரம் பேர் அமர்ந்து பார்வையிடும் வகையில் பார்வையாளர்கள் இடம் கட்டப்பட்டுள்ளது.

எல்.வி.எம்.3 ராக்கெட் ஏவப்படுவதை பார்வையிட விரும்பும் பொதுமக்கள் மற்றும் மாணவர்கள் https://lvg.shar.gov.in என்ற இணையதள முகவரிக்கு சென்று முன்பதிவு செய்து கொள்ள வேண்டும் என்று இஸ்ரோ விஞ்ஞானிகள் கூறினர்.

இந்த ராக்கெட் விண்ணில் ஏவப்படுவதை முன்னிட்டு ஸ்ரீஹரிகோட்டா அருகில் உள்ள திருவள்ளூர் மாவட்டம் பழவேற்காடு பகுதியைச் சேர்ந்த மீனவர்கள் வருகிற 2-ந்தேதி கடலில் மீன் பிடிக்க செல்ல வேண்டாம் என்று மீன்வளத்துறை அதிகாரிகள் கேட்டுக் கொண்டுள்ளனர்.

Hindusthan Samachar / vidya.b