சென்னை, 24 டிசம்பர் (ஹி.ச.)

தேசிய நுகர்வோர் உரிமைகள் தினம் இந்தியாவில் ஆண்டுதோறும் டிசம்பர் 24 அன்று கொண்டாடப்படுகிறது.

நுகர்வோர் உரிமைகளைப் பாதுகாப்பதற்காக 1986-ஆம் ஆண்டு நுகர்வோர் பாதுகாப்புச் சட்டம் இதே நாளில் நடைமுறைக்கு வந்ததை நினைவுகூரும் வகையில் இத்தினம் அனுசரிக்கப்படுகிறது.

நுகர்வோர் சந்தையில் எதிர்கொள்ளும் சுரண்டல்கள், கலப்படம், மற்றும் முறையற்ற வணிக முறைகளுக்கு எதிராக விழிப்புணர்வை ஏற்படுத்துவதே இந்நாளின் முதன்மை நோக்கமாகும்.

நுகர்வோர் பாதுகாப்புச் சட்டத்தின் கீழ் ஒவ்வொரு இந்திய நுகர்வோருக்கும் பின் வரும் உரிமைகள் வழங்கப்பட்டுள்ளன.

பாதுகாப்பு உரிமை:

உயிருக்கும் ஆரோக்கியத்திற்கும் ஆபத்தான பொருட்களுக்கு எதிராகப் பாதுகாப்புப் பெறும் உரிமை.

தகவல் பெறும் உரிமை:

பொருளின் தரம், அளவு, தூய்மை மற்றும் விலை போன்ற தகவல்களைத் தெரிந்துகொள்ளும் உரிமை.

தேர்ந்தெடுக்கும் உரிமை:

பல்வேறு வகையான பொருட்களை நியாயமான விலையில் ஒப்பிட்டுப் பார்த்து வாங்கும் உரிமை.

கேட்கப்படும் உரிமை:

நுகர்வோரின் குறைகள் அல்லது புகார்கள் உரிய மன்றங்களில் கவனிக்கப்படுவதை உறுதி செய்யும் உரிமை.

குறைதீர்க்கும் உரிமை:

நியாயமற்ற வணிக முறைகளால் ஏற்படும் பாதிப்புகளுக்கு இழப்பீடு பெறும் உரிமை.

நுகர்வோர் கல்வி உரிமை : தங்களின் உரிமைகள் குறித்துப் போதிய விழிப்புணர்வைப் பெறும் உரிமை.

நுகர்வோராக நீங்கள் ஏமாற்றப்பட்டால் அல்லது பாதிக்கப்பட்டால், பின்வரும் வழிகளில் புகார் அளிக்கலாம்.

தேசிய நுகர்வோர் உதவி எண்: 1800-11-4000 அல்லது 1915 என்ற எண்களை அழைக்கலாம்.

ஆன்லைன் போர்டல்:

தேசிய நுகர்வோர் உதவி மையம் மூலம் ஆன்லைனில் புகார் பதிவு செய்யலாம்.

நுகர்வோர் நீதிமன்றங்கள்:

பாதிப்பின் மதிப்பைப் பொறுத்து மாவட்ட, மாநில அல்லது தேசிய அளவிலான நுகர்வோர் நீதிமன்றங்களை அணுகலாம்.

Hindusthan Samachar / JANAKI RAM