சென்னை, 02 ஜனவரி (ஹி.ச.)

குரோம்பேட்டையில் உள்ள ராதாநகர் மெயின் ரோடு ஜி.எஸ்.டி. சாலையுடன் இணைக்கும் முக்கிய பாதையில் உள்ள ரயில்வே லெவல் கிராஸிங்கால் ஏற்படும் போக்குவரத்து நெரிசலைக் குறைக்க 2011 ஆம் ஆண்டு சுமார் 14.75 கோடி ரூபாய் செலவில் மாநில நெடுஞ்சாலைத் துறை மற்றும் தெற்கு ரயில்வே இணைந்து குரோம்பேட்டை ராதாநகர் சுரங்கப்பாதை திட்டத்தை மேற்கொண்டன.

ஆனால், ஒருங்கிணைப்பு சிக்கல்கள் மற்றும் மெதுவான முன்னேற்றம் காரணமாக பல ஆண்டுகளாக இந்த திட்டம் தாமதமானது. நெடுஞ்சாலைத் துறை தனது வேலையை முடித்துவிட்டாலும், தெற்கு ரயில்வே நடைமேடைகளுக்கு அருகில் படிக்கட்டுகள் மற்றும் அணுகல் வசதிகளை முடிக்க பல மாதங்கள் எடுத்துக்கொண்டது. இந்த சுரங்கப்பாதை செப்டம்பரில் திறக்க திட்டமிடப்பட்டிருந்தது.

இந்த சுரங்கப்பாதை ரயில் தண்டவாளங்களுக்கு குறுக்கே, ஹஸ்தினாபுரம் ராஜேந்திர பிரசாத் சாலை மற்றும் ஜிஎஸ்டி சாலைக்கு இணையாக அமைந்துள்ளது.இருபுறமும் ரயில் நிலையம் மற்றும் டிக்கெட் கவுண்டர்களுக்கு நேரடியாக செல்ல 3 மீட்டர் அகலமுள்ள பாதசாரிகள் நடைபாதையும் அமைக்கப்பட்டுள்ளது. பேருந்துகள் பயணிகளை நடைமேடைகளுக்கு அருகில் இறக்கிவிட முடியும். இது கடைசி மைல் இணைப்பை மேம்படுத்தும்.

குரோம்பேட்டை ராதாநகர் சுரங்கப்பாதை திட்டத்தின் அனைத்து பணிகளும் நடைபெற்று முடிந்து இப்போது திறப்பு விழாவுக்கு தயாராக உள்ளது. 15 ஆண்டு கால இழுபறிக்கு பிறகு ரூ.32 கோடி செலவில் உருவாக்கப்பட்டு உள்ள ராதா நகர் சுரங்கப் பாதை வருகிற ஜனவரி

7-ந்தேதி (புதன்கிழமை) திறக்கப் அறிவிக்கப்பட்டு உள்ளது.

ஜனவரி 7-ந்தேதி மாலை துணை முதல்-அமைச்சர் உதயநிதி ஸ்டாலின் நேரில் சென்று ராதாநகர் சுரங்கப் பாதையை திறந்து வைக்கிறார். அமைச்சர் தா.மோ.அன்பரசன், சட்ட மன்ற உறுப்பினர் இ.கருணா நிதி மற்றும் மாநகராட்சி அதிகாரிகள் இதற்கான முன்னேற்பாடுகளை செய்து வருகின்றனர்.

இந்த சுரங்கப்பாதை திறக்கப்படுவதின் மூலம் குரோம்பேட்டை ராதாநகர், பாரதிபுரம், நெமிலிச்சேரி. அஸ்தினாபுரம் பகுதிகளை சேர்ந்த 1 லட்சத்திற்கும் மேற்பட்ட பொதுமக்கள் பயன் அடைவார்கள்.

Hindusthan Samachar / vidya.b