மதுரை, 09 ஜனவரி (ஹி.ச.)

மதுரை மாநகரில் சிறப்பு சார்பு ஆய்வாளர் ஒருவர் தூக்கிட்டு தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது. மதுரை விஸ்வநாதபுரம் பகுதியில் அமைந்துள்ள குதிரைப்படை காவலர் குடியிருப்பில் வசித்து வந்த சிறப்பு சார்பு ஆய்வாளர் குழந்தைசாமி (59) இன்று காலை வீட்டிற்குள் தூக்கிட்டு தற்கொலை செய்து கொண்டதாக தகவல் வெளியாகியுள்ளது.

குழந்தைசாமி சமீப காலமாக உடல்நலக் குறைவு காரணமாக அறுவை சிகிச்சை மேற்கொண்டிருந்ததாகவும், அதனைத் தொடர்ந்து கடந்த சில நாட்களாக மருத்துவ விடுப்பில் இருந்ததாகவும் கூறப்படுகிறது. இந்நிலையில் இன்று காலை வீட்டில் தனியாக இருந்த போது அவர் இந்த அதிர்ச்சி செயலில் ஈடுபட்டதாக முதற்கட்ட தகவல்கள் தெரிவிக்கின்றன.

இந்த சம்பவம் குறித்து தகவல் அறிந்த தல்லாகுளம் காவல்துறையினர் உடனடியாக சம்பவ இடத்திற்கு சென்று விசாரணை மேற்கொண்டனர். வீட்டிற்குள் அவரது உடல் தூக்கில் தொங்கிய நிலையில் இருந்ததாகவும், பின்னர் சடலத்தை மீட்டு பிரேத பரிசோதனைக்காக அரசு மருத்துவமனைக்கு அனுப்பியதாகவும் போலீசார் தெரிவித்தனர்.

ஓய்வு பெற இன்னும் நான்கு மாதங்களே உள்ள நிலையில், அனுபவமிக்க காவல் அதிகாரி ஒருவர் தற்கொலை செய்து கொண்டது காவல்துறை வட்டாரத்திலும், அவரது குடும்பத்தினரிடமும் மிகுந்த அதிர்ச்சியையும் வேதனையையும் ஏற்படுத்தியுள்ளது.

அவர் தற்கொலை செய்து கொண்டதற்கான காரணம் குறித்து தெளிவான தகவல்கள் வெளியாகாத நிலையில், உடல்நலப் பிரச்சினை அல்லது மன அழுத்தம் காரணமாக இருக்குமா என்ற கோணத்திலும் விசாரணை நடைபெற்று வருகிறது.

இந்த சம்பவம் தொடர்பாக தல்லாகுளம் காவல்துறையினர் வழக்குப் பதிவு செய்து, அவரது குடும்பத்தினரிடம் விசாரணை நடத்தி வருகின்றனர். குழந்தைசாமியின் மறைவால் சக காவலர்கள் மற்றும் அப்பகுதி மக்கள் ஆழ்ந்த இரங்கலை தெரிவித்துள்ளனர்.

Hindusthan Samachar / ANANDHAN