சென்னை, 15 மார்ச் (ஹி.ச.)

ஜோலார்பேட்டை ரயில் யார்டில் தண்டவாளப் பாதை சீரமைப்பு மற்றும் மின்சாரப் பராமரிப்பு பணிகள் மேற்கொள்ளப்படவுள்ளன.

இது குறித்து தெற்கு ரயில்வேயின் சென்னை கோட்டம் வெளியிட்டுள்ள செய்திக்குறிப்பில் பின்வருமாறு தெரிவிக்கப்பட்டுள்ளது:-

அரக்கோணம்-ஜோலார்பேட்டை வழித்தடத்தில் ஜோலார்பேட்டை ரயில் யார்டில் தண்டவாளப் பாதை மற்றும் மின்சாரப் பராமரிப்புப் பணிகள் இன்று (ஞாயிற்றுக்கிழமை) முதல் 17-ஆம் தேதி வரை பகல் 2.10 மணி முதல் மாலை 4.10 மணி வரை நடைபெறும்.

இதன் காரணமாக, இன்று முதல் 17-ஆம் தேதி வரை பயணிகள் மின்சார ரயில் சேவையில் குறிப்பிட்ட தூரம் ரத்து செய்யப்பட்டுள்ளது.

அதன்படி, கே.எஸ்.ஆர். பெங்களூரு- ஜோலார்பேட்டை பயணிகள் மின்சார ரயில் (வண்டி எண் 66550) சோமநாயக்கன்பட்டிக்கும்- ஜோலார்பேட்டைக்கும் இடையிலும், அதேபோல் மறுமார்க்கத்தில் இந்த ரயில் (66549) ஜோலார்பேட்டைக்கும்-சோமநாயக்கன்பட்டிக்கும் இடையிலும் குறிப்பிட்ட தூரம் ரத்து செய்யப்படுகிறது.

அதே போன்று ஈரோடு-ஜோலார்பேட்டை பயணிகள் மின்சார ரயில் (56108) திருப்பத்தூருக்கும்- ஜோலார்பேட்டைக்கும் இடையிலும், மறுமார்க்கத்தில் ஜோலார்பேட்டை- ஈரோடு பயணிகள் மின்சார ரயில் (56017) ஜோலார்பேட்டைக்கும்-திருப்பத்தூருக்கும் இடையிலும் குறிப்பிட்ட தூரம் ரத்து செய்யப்படுகிறது.

இவ்வாறு அதில் குறிப்பிடப்பட்டுள்ளது.

Hindusthan Samachar / JANAKI RAM