புதுடெல்லி, 19 மார்ச் (ஹி.ச.)

பச்சிளங்குழந்தைகள் இறப்பு விகிதம் கடந்த 34 ஆண்டுகளில் ஏறக்குறைய 70 சதவீதம் குறைந்துள்ளதாக ஐக்கிய நாடுகள் அமைப்பின் சமீபத்திய அறிக்கை சுட்டிக்காட்டுகிறது.

இதனைத் தொடர்ந்து, தாய் மற்றும் பச்சிளங்குழந்தைகள் சுகாதாரத் துறையில் இந்தியா சாதித்த முன்னேற்றத்தை மத்திய சுகாதாரத் துறை அமைச்சர் ஜே.பி. நட்டா இன்று பாராட்டியுள்ளார்.

இது குறித்து அவர் தனது சமூக வலைத்தள பதிவில், குழந்தைகள் இறப்பு விகிதத்தைக் குறைக்கும் முயற்சிகளில் இந்தியா உலகளவில் முன்னுதாரணமாக திகழ்கிறது என தெரிவித்துள்ளார்.

ஐ.நா.வின் ஐஜிஎம்இ (IGME) 2025 அறிக்கையின்படி, 1990-ஆம் ஆண்டில் உயிருடன் பிறக்கும் ஒவ்வொரு 1,000 குழந்தைகளில் 57 இறப்புகள் பதிவாகியிருந்த நிலையில், 2024-ஆம் ஆண்டில் அது 17-ஆகக் குறைந்துள்ளது.

மேலும், 5 வயதிற்குட்பட்ட குழந்தைகள் இறப்பு விகிதமும் கணிசமாகக் குறைந்துள்ளது. 1990-இல் 127-ஆக இருந்த இந்த விகிதம், 2024-இல் 27-ஆக சரிந்துள்ளது.

இந்த முன்னேற்றத்திற்கு சிறப்புப் பச்சிளங்குழந்தைகள் பராமரிப்புப் பிரிவுகள் (SNCU), ஜனனி சுரக்ஷா யோஜனா (JSY), ஜனனி சிசு சுரக்ஷா கார்யக்ரம் (JSSK) உள்ளிட்ட அரசுத் திட்டங்கள் மற்றும் விரிவுபடுத்தப்பட்ட தடுப்பூசி இயக்கங்கள் காரணமாக அமைந்துள்ளதாக அமைச்சர் குறிப்பிட்டார்.

மேலும், பிரதமர் நரேந்திர மோடியின் தலைமையில், தாய் மற்றும் குழந்தைகள் சுகாதாரத்தில் இந்தியா கடைப்பிடித்த இலக்குசார்ந்த மற்றும் ஒருங்கிணைந்த அணுகுமுறை, தடுக்கக்கூடிய குழந்தைகள் இறப்புகளை குறைப்பதில் முக்கிய பங்காற்றியுள்ளதாகவும் அவர் தெரிவித்துள்ளார்.

இதேவேளை, ஐக்கிய நாடுகள் சபையின் குழந்தைகள் இறப்பு விகித மதிப்பீட்டிற்கான 2025 அறிக்கையும், குழந்தைகள் இறப்பு விகிதத்தை குறைப்பதில் உலகளாவிய முன்னேற்றத்திற்கு இந்தியா முக்கிய பங்களிப்பு செய்துள்ளதாக வலியுறுத்துகிறது.

Hindusthan Samachar / JANAKI RAM