புதுடெல்லி, 02 மார்ச் (ஹி.ச.)

டெல்லி அரசால் இன்று ஏற்பாடு செய்யப்பட்ட 'சஷக்த் நாரி, சம்ரித் டெல்லி' என்ற நிகழ்வில் ஜனாதிபதி திரௌபதி முர்மு கலந்து கொண்டு சிறப்புரை ஆற்றினார்.

இந்த நிகழ்ச்சியில் அவர் பேசியதாவது,

இன்று, பெண்கள் ஒவ்வொரு துறையிலும் சிறந்து விளங்குகிறார்கள். வீரர்களாக, அவர்கள் நாட்டின் எல்லைகளைப் பாதுகாக்கிறார்கள்.

விஞ்ஞானிகளாக, அவர்கள் ஆய்வகங்களில் ஆராய்ச்சி செய்கிறார்கள். விளையாட்டுப் போட்டிகளில், அவர்கள் சர்வதேச தளங்களில் இந்தியக் கொடியை உயர்த்துகிறார்கள்.

பெண்கள் அரசியல், சமூக சேவை, நிர்வாகம் மற்றும் வணிகத்தில் புதிய உயரங்களை எட்டுகிறார்கள். நாடு முழுவதும் பட்டமளிப்பு விழாக்களில் பட்டங்கள் மற்றும் பதக்கங்களைப் பெறும் மாணவர்களிடையே பெண்களின் எண்ணிக்கை அதிகரித்து வருகின்றது. இது ஒரு ஊக்கமளிக்கும் நிகழ்வு.

இருப்பினும், வன்முறை, பொருளாதார சமத்துவமின்மை, சமூக ஏற்றத்தாழ்வுகள் மற்றும் சுகாதாரப் பராமரிப்பில் புறக்கணிப்பு போன்ற சவால்களை பெண்கள் தொடர்ந்து எதிர்கொள்கின்றனர்.

பெண்கள் அதிகாரத்தில் அமரும் போது மட்டுமே இந்தத் தடைகளை நீக்க முடியும். ஒரு பெண் சுயாதீனமான முடிவுகளை எடுக்கும் திறன் கொண்டிருப்பின் சுயமரியாதையுடன் கூடிய வாழ்க்கை வாழ முடியும். சம வாய்ப்புகள் மற்றும் பாதுகாப்பைப் பெற முடியும் போது அவள் உண்மையிலேயே அதிகாரம் பெறுவாள்.

அதிகாரம் பெற்ற ஒரு பெண், தனது சொந்த வாழ்க்கையை மட்டுமல்ல, சமூகம் மற்றும் எதிர்கால சந்ததியினரின் திசையையும் வடிவமைக்க முடியும்.

பெண்களின் மேம்பாட்டை நோக்கமாகக் கொண்ட அரசாங்க முயற்சிகளை பாராட்டுகிறேன். பேட்டி பச்சாவ் பேட்டி பதாவோ, பிரதான் மந்திரி உஜ்வாலா யோஜனா, பிரதான் மந்திரி முத்ரா யோஜனா, லக்பதி தீதி யோஜனா மற்றும் பிரதான் மந்திரி மாத்ரு வந்தனா யோஜனா போன்ற திட்டங்கள், பெண்களின் சமூக, பொருளாதார மற்றும் அரசியல் நிலையை மேம்படுத்துவதற்கு பங்களிக்கின்றன.

அதே நேரத்தில், பெண்களுக்கு அதிகாரமளிப்பது அரசாங்கத்தின் பொறுப்பு மட்டுமல்ல, இது சமூகத்தின் ஒவ்வொரு உறுப்பினர் மற்றும் நிறுவனத்தின் பொறுப்பாகும். பெண்களுக்கு கல்வி கற்பித்தல், அவர்களின் தன்னம்பிக்கையை கட்டியெழுப்புதல் மற்றும் அவர்களுக்கு ஊக்கம் மற்றும் ஆதரவை வழங்குதல் நமது கடமை.

பெண்கள் கனவு காணவும் அவர்களின் விருப்பங்களை நிறைவேற்றவும் முடியும் என்பதை சமூகம் உறுதி செய்ய வேண்டும்.

டெல்லியில் பெண்களின் பாதுகாப்பு, கல்வி மற்றும் தன்னம்பிக்கை நாடு முழுவதும் ஒரு வலுவான மற்றும் நேர்மறையான செய்தியை அனுப்பும். முழு நாட்டிற்கும் பெண்கள் தலைமையிலான வளர்ச்சிக்கு ஒரு முன்மாதிரியாக டெல்லியை அமைக்க முன்வர வேண்டும்

வளமான டெல்லி மற்றும் வளர்ந்த இந்தியா என்ற தொலைநோக்குப் பார்வைக்கு பெண்கள் முழுமையாக பங்களிக்க, அரசாங்கமும் சமூகமும், பெண்களுக்கு பயம் அல்லது அழுத்தம் இல்லாமல் சுதந்திரமான முடிவுகளை எடுக்கக்கூடிய சூழலை உருவாக்க வேண்டும்.

இவ்வாறு ஜனாதிபதி கூறினார்.

Hindusthan Samachar / vidya.b