ஹைதராபாத், 22 மார்ச் (ஹி.ச.)

பயிர் கொள்முதல் சிக்கல்களுடன் தொடர்புடையதாகக் கூறப்படும் விவசாயி தற்கொலை விவகாரத்தை முன்னிட்டு, தெலங்கானா அரசை பாரத் ராஷ்டிர சமிதி (பிஆர்எஸ்) செயல் தலைவர் கே.டி. ராமராவ் (கேடிஆர்) இன்று கடுமையாக விமர்சித்தார்.

சித்திப்பேட்டை மாவட்டத்தில் முதல்வர் ரேவந்த் ரெட்டி விவசாயத் திட்டங்கள் மற்றும் வளர்ச்சி அறிவிப்புகளை வெளியிட்டு வந்த நிலையில், சம்பவம் குறித்து கருத்து தெரிவித்த கேடிஆர்,

இதை தற்கொலை அல்ல, அரசின் கொலை எனக் குறிப்பிட்டார்.

இது தொடர்பாக தனது பேஸ்புக் பதிவில் அவர் கூறியதாவது:

காங்கிரஸ் அரசு விவசாயிகள் அறுவடை செய்த பயிர்களை கொள்முதல் செய்யாததால் அவர்கள் எதிர்கொள்ளும் துயரங்களை அறிந்துகொள்ளும் நோக்கில், கடந்த ஆண்டு நவம்பர் 18ஆம் தேதி உள்ளூர் பிஆர்எஸ் தலைவர்களுடன் ஆதிலாபாத் சந்தை வளாகத்திற்குச் சென்றேன்.

அதற்கு முன் நாள், ஆதிலாபாத் மாவட்டம் ஆர்லி கிராமத்தைச் சேர்ந்த துடும் கணபதி, தனது பிரச்சினைகளை ஊடகங்களிடம் கண்ணீருடன் பகிர்ந்திருந்தார். நான்கு நாட்களாக சந்தை வளாகத்திலேயே தங்கி இருந்த அவர், தனது சோயாபீன் பயிரை யாரும் கொள்முதல் செய்ய முன்வரவில்லை என்று வேதனை தெரிவித்துள்ளார்.

பயிர் கொள்முதல் தொடர்ந்து தாமதமானால், தற்கொலை செய்வதைத் தவிர வேறு வழியில்லை என அவர் தெரிவித்திருந்தார்.

பயிர்க்கடன் தள்ளுபடி இல்லை. விவசாயிகளுக்கான உறுதிமொழிகள் நிறைவேற்றப்படவில்லை. கடன் சுமை அதிகரித்துள்ளது. இதன் விளைவாக, மூன்று நாட்களுக்கு முன்பு கணபதி உயிரிழந்தார். இது தற்கொலை அல்ல. ரேவந்த் ரெட்டி அரசின் நேரடி பொறுப்பாகும், என்று அவர் குற்றம்சாட்டினார்.

முதல்வர் ரேவந்த் ரெட்டி விவசாயம் மற்றும் வளர்ச்சி தொடர்பான நிகழ்ச்சிகளில் பங்கேற்க சித்திப்பேட்டை மாவட்டத்துக்கு பயணம் மேற்கொண்டிருக்கும் சூழலில், கேடிஆர் இந்த குற்றச்சாட்டுகளை முன்வைத்துள்ளார்.

Hindusthan Samachar / JANAKI RAM