சென்னை, 26 மார்ச் (ஹி.ச.)

உலகம் முழுவதும் மார்ச் 26-ஆம் தேதி சர்வதேச ஊதா நாள் என வலிப்பு நோய் விழிப்புணர்வு தினமாக கடைப்பிடிக்கப்படுகிறது.

ஊதா நாள் - பின்னணி:

துவக்கம் - 2008-ஆம் ஆண்டு, கனடாவைச் சேர்ந்த 9 வயது சிறுமி காசிடி மேகன் என்பவரால் இந்த முன்னெடுப்பு தொடங்கப்பட்டது.

நோக்கம் - வலிப்பு நோயால் பாதிக்கப்பட்டவர்கள் தனிமையில் இல்லை என்பதை உணர்த்துவதும், அவர்களைப் பற்றிய சமூகப் பார்வையை மாற்றுவதும் இதன் முக்கிய நோக்கமாகும்.

ஊதா நிறம் - லாவண்டர் மலரின் நிறமான ஊதா, தனிமையைக் குறிப்பதால், வலிப்பு நோயாளிகளின் போராட்டத்தை அங்கீகரிக்க இந்த நிறம் தேர்ந்தெடுக்கப்பட்டது.

வலிப்பு நோய் குறித்த விழிப்புணர்வு:

காரணம் - மூளையில் உள்ள நரம்புச் செல்களில் ஏற்படும் மின் வேதியியல் மாற்றங்களால் வலிப்பு ஏற்படுகிறது. இது ஒரு தொற்று நோய் அல்ல.

பாதிப்பு - உலகளவில் சுமார் 5 கோடி மக்கள் இந்நோயால் பாதிக்கப்பட்டுள்ளனர்.

வலிப்பு வரும்போது செய்ய வேண்டிய அடிப்படை முதலுதவிகள்:

நோயாளிக்கு அருகில் ஆபத்தானப் பொருட்கள் (கண்ணாடி, கூர்மையானவை) இருந்தால் அவற்றை அகற்ற வேண்டும்.

அவர்கள் தலையடியில் மென்மையான துணி அல்லது தலையணையை வைக்க வேண்டும்.

வலிப்பு நின்றவுடன், அவர்களை ஒரு பக்கமாகச் சாய்த்துப் படுக்க வைக்க வேண்டும் (இது சுவாசப்பாதை சீராக இருக்க உதவும்).

தவறான நம்பிக்கைகள் - செய்யக்கூடாதவை:

வலிப்பு வரும்போது கையில் சாவி அல்லது இரும்புப் பொருட்களைக் கொடுப்பது எந்தப் பயனையும் தராது.

வாயில் ஸ்பூன் அல்லது துணியை வலுக்கட்டாயமாகத் திணிக்கக் கூடாது.

வலிப்பின் போது அவர்களின் கை, கால்களை அழுத்திப் பிடித்துக் கட்டுப்படுத்த முயலக் கூடாது.

சரியான நேரத்தில் சிகிச்சை மற்றும் மருந்துகளை எடுத்துக் கொள்வதன் மூலம் வலிப்பு நோயைக் கட்டுப்படுத்த முடியும்.

Hindusthan Samachar / JANAKI RAM