புதுடெல்லி, 27 மார்ச் (ஹி.ச.)

எஃகு உற்பத்தியில் பயன்படுத்தப்படும் உயர்தர கோக்கிங் நிலக்கரியின் இறக்குமதியைச் சார்ந்திருக்கும் நிலையைக் குறைப்பதற்கும், நிலக்கரியின் தரத்தை மேம்படுத்துவதற்குமான, 8 புதிய கோக்கிங் நிலக்கரி சுத்திகரிப்பு ஆலைகளை அமைக்க சுமார் ரூ. 3,300 கோடி முதலீடு செய்யத் திட்டமிட்டுள்ளதாக கோல் இந்தியா நிறுவனம் இன்று (மார்ச் 27) அறிவித்தது.

கோக்கிங் நிலக்கரி, எஃகு தயாரிப்பில் ஒரு முக்கிய மூலப்பொருள் ஆகும். இருப்பினும், உள்நாட்டு இருப்புகளில் 25 முதல் 45 சதவீதம் வரை மிக அதிக சாம்பல் உள்ளடக்கம் இருப்பதால், விலை உயர்ந்த இறக்குமதிகளை நாட வேண்டிய கட்டாயத்தில் இந்தியா உள்ளது.

ஆண்டுக்கு 21.5 மில்லியன் டன்கள் (MTY) என்ற ஒருங்கிணைந்த கொள்ளளவை சேர்க்கும் என எதிர்பார்க்கப்படும் இந்த புதிய சுத்திகரிப்பு ஆலைகள், 2029-30-க்குள் செயல்பாட்டுக்கு வரும் எனத் திட்டமிடப்பட்டுள்ளது.

கோல் இந்தியா தற்போது 18.35 மில்லியன் டன்கள் மொத்த கொள்ளளவு கொண்ட 10 சுத்திகரிப்பு ஆலைகளின் வலையமைப்பைக் கொண்டுள்ளது. இதன் மூலம், அடுத்த நான்கு ஆண்டுகளில் இந்த விரிவாக்கம் கொள்ளளவை இருமடங்கிற்கும் மேலாக அதிகரிக்கும்.

இந்த பொதுத்துறை சுரங்க நிறுவனமானது, தனது தற்போதைய கோக்கிங் நிலக்கரி சுத்திகரிப்பு ஆலைகளின் செயல்திறன் மற்றும் பயன்பாட்டை மேம்படுத்துவதற்காக, அவற்றைப் புதுப்பித்து நவீனமயமாக்குவதில் சுமார் ரூ. 300 கோடி முதலீடு செய்யவும் திட்டமிட்டுள்ளது.

எட்டு புதிய ஆலைகளில், மொத்தம் 14.5 மில்லியன் டன் உற்பத்தித் திறன் கொண்ட ஐந்து ஆலைகள் சென்ட்ரல் கோல்ஃபீல்ட்ஸ் லிமிடெட்டின் கீழும், 7 மில்லியன் டன் உற்பத்தித் திறன் கொண்ட மூன்று ஆலைகள் பாரத் கோக்கிங் கோல் லிமிடெட்டின் கீழும் அமைக்கப்படும்.

கோல் இந்தியா, தேசிய பணமாக்கல் திட்டத்தின்படி உற்பத்தித் திறன், மீட்புத் திறன் மற்றும் செயல்முறை நம்பகத்தன்மையை மேம்படுத்துவதற்காக, இரண்டு பழமையான சுத்திகரிப்பு ஆலைகளைப் புதுப்பித்து நவீனமயமாக்கி வருகிறது.

மேலும், உள்நாட்டு எஃகுத் துறைக்குத் தரமான கோக்கிங் நிலக்கரி விநியோகத்தை அதிகரிப்பதற்காக, சுத்திகரிப்புத் திறன் மற்றும் தொழில்நுட்ப நிபுணத்துவத்தைப் பயன்படுத்திக்கொள்ள, தனியார் துறையின் முக்கிய நிறுவனமான டாடா ஸ்டீலுடன் கோல் இந்தியா இணைந்து பணியாற்றி வருகிறது.

இந்த ஒருங்கிணைந்த முயற்சிகள், இறக்குமதி செய்யப்படும் கோக்கிங் நிலக்கரிக்கு மாற்றாகப் பயன்படுத்தவும், அந்நிய செலாவணிச் செலவைக் குறைக்கவும், தொழில்துறை போட்டித்திறனை மேம்படுத்தவும் உதவும் என்று கோல் இந்தியா தெரிவித்துள்ளது.

Hindusthan Samachar / vidya.b