சென்னை, 12 ஏப்ரல் (ஹி.ச)

தமிழகத்தில் நடைபெற உள்ள சட்டமன்றத் தேர்தலை முன்னிட்டு, தமிழக வெற்றிக் கழகத்தின் தலைவர் விஜய் தலைமையில் முக்கிய ஆலோசனை கூட்டம் நடைபெற உள்ளது.

தேர்தல் பணிகளை தீவிரப்படுத்தும் நோக்கில் ஏற்பாடு செய்யப்பட்டுள்ள இந்தக் கூட்டம், கட்சியின் அடுத்த கட்ட நடவடிக்கைகளுக்கு திசை நிர்ணயிக்கும் முக்கிய நிகழ்வாக பார்க்கப்படுகிறது.

இதன்படி, வருகிற ஏப்ரல் 16ஆம் தேதி நடைபெறவுள்ள இந்த ஆலோசனை கூட்டத்தில், மாநில மற்றும் மாவட்ட செயலாளர்கள் உட்பட முக்கிய நிர்வாகிகள் கலந்து கொள்ள உள்ளனர்.

மொத்தம் சுமார் 800க்கும் மேற்பட்டோர் பங்கேற்க உள்ளதாக தகவல்கள் வெளியாகியுள்ளன.

சென்னை நுங்கம்பாக்கத்தில் அமைந்துள்ள தாஜ் கோரமண்டல் நட்சத்திர விடுதியில் நடைபெறவுள்ள இந்தக் கூட்டத்தில், தேர்தல் முன்னேற்பாடுகள் குறித்து விரிவான ஆலோசனை நடைபெற உள்ளது.

குறிப்பாக, தொகுதி வாரியாக பிரசாரத் திட்டங்களை தீட்டுவது, வாக்காளர்களை அணுகும் முறைகளை மேம்படுத்துவது, கட்சி நிர்வாகிகளின் பொறுப்புகளை தெளிவுபடுத்துவது போன்ற முக்கிய அம்சங்கள் விவாதிக்கப்பட உள்ளன.

மேலும், தேர்தல் பிரசாரத்தை மேலும் வலுப்படுத்த சமூக வலைதளங்கள், தரை மட்ட பணிகள், இளைஞர் மற்றும் பெண்கள் அணியின் செயல்பாடுகள் போன்றவற்றை ஒருங்கிணைக்கும் திட்டங்களும் பரிசீலிக்கப்பட உள்ளதாக கூறப்படுகிறது.

இந்தக் கூட்டத்தின் மூலம், தேர்தலுக்கு முன் கட்சியின் இயந்திரத்தை முழுமையாக செயல்படுத்த விஜய் தீவிர முயற்சி மேற்கொண்டு வருகிறார்.

நிர்வாகிகளுக்கு நேரடியாக வழிகாட்டுதல் வழங்கி, ஒற்றுமையாக செயல்பட வேண்டிய அவசியத்தையும் அவர் வலியுறுத்துவார் என எதிர்பார்க்கப்படுகிறது.

Hindusthan Samachar / P YUVARAJ