புதுச்சேரி, 13 ஏப்ரல் (ஹி.ச.)

புதுச்சேரி மாநிலம்,காரைக்கால் மாவட்டத்தில் பாரதியார் சாலையில் இன்று மதியம் சுமார் 11.40 மணியளவில் பழைய கட்டிடம் ஒன்று திடீரென இடிந்து விழுந்தது.

இந்த திடீர் விபத்தால் அந்தப் பகுதியில் பெரும் பதற்றம் நிலவியது.

அப்போது சாலையில் சென்று கொண்டிருந்த ஒரு மூதாட்டி மீது கட்டிடம் இடிந்து விழுந்ததால், அவர் சம்பவ இடத்திலேயே உயிரிழந்ததாக தகவல்கள் தெரிவிக்கின்றன.

சம்பவம் குறித்து தகவல் கிடைத்ததும் தீயணைப்பு துறையினரும் காவல்துறையினரும் உடனடியாக சம்பவ இடத்திற்கு விரைந்து வந்து மீட்பு பணிகளில் ஈடுபட்டனர்.

இடிபாடுகளுக்குள் சிக்கியிருந்த மூதாட்டியின் உடலை அவர்கள் மீட்டனர்.

மேலும், இடிந்து விழுந்த கட்டிடத்தின் இடிபாடுகளுக்குள் வேறு யாரேனும் சிக்கியுள்ளனரா என்பதை கண்டறிய தீயணைப்பு வீரர்கள் தீவிரமாக தேடுதல் பணியில் ஈடுபட்டு வருகின்றனர்.

பாதுகாப்பு காரணங்களுக்காக அந்தப் பகுதி முற்றுகையிடப்பட்டு பொதுமக்கள் அங்கு செல்லாமல் தடுக்கப்பட்டுள்ளது.

இந்த சம்பவம் குறித்து போலீசார் வழக்குப் பதிவு செய்து விசாரணை மேற்கொண்டு வருகின்றனர்.

கட்டிடத்தின் பழுது நிலை மற்றும் பராமரிப்பு குறைபாடு காரணமாக இந்த விபத்து ஏற்பட்டதா என்பது குறித்து ஆய்வு செய்து வருகின்றனர்.

பழைய கட்டிடங்களை முறையாக பரிசோதித்து பாதுகாப்பு நடவடிக்கைகள் மேற்கொள்ள வேண்டும் என்பதையும், இல்லையெனில் இத்தகைய விபத்துகள் ஏற்படும் அபாயம் இருப்பதையும் இந்த சம்பவம் மீண்டும் நினைவூட்டுகிறது.

Hindusthan Samachar / ANANDHAN