புதுடெல்லி, 16 ஏப்ரல் (ஹி.ச)

நாடாளுமன்றத்தின் நீட்டிக்கப்பட்ட பட்ஜெட் கூட்டத்தொடரின் மூன்று நாள் சிறப்பு அமர்வு இன்று

( ஏப்ரல் 16 ஆம் தேதி) தொடங்குகிறது.

நாரி சக்தி வந்தன் அதினியம் சட்டத்தை அமல்படுத்துவது தொடர்பான அரசியலமைப்பு திருத்தங்கள் குறித்து இந்த அமர்வில் முக்கிய விவாதம் நடைபெறவுள்ளது.

மக்களவை மற்றும் மாநில சட்டப்பேரவைகளில் பெண்களுக்கு 33 சதவீத இடஒதுக்கீடு வழங்கும் இந்த சட்டம் 2023 இல் நிறைவேற்றப்பட்டது. இதை செயல்பாட்டுக்கு கொண்டுவர அரசு மூன்று திருத்த மசோதாக்களை அறிமுகப்படுத்த உள்ளது.

இந்த வார தொடக்கத்தில், மத்திய அரசு எம்.பி.க்களுக்கு அரசியலமைப்பு 131ஆவது திருத்த மசோதா, 2026 அல்லது மகளிர் இடஒதுக்கீடு மசோதாவுக்கான முன்மொழியப்பட்ட திருத்தத்தின் வரைவை பகிர்ந்தது. இந்த மசோதா மக்களவை உறுப்பினர்களின் எண்ணிக்கையை மாநிலங்கள் மற்றும் யூனியன் பிரதேசங்களைச் சேர்ந்த உறுப்பினர்கள் உட்பட 850 ஆக உயர்த்த முன்மொழிகிறது.

மாநிலங்களில் உள்ள தொகுதிகளிலிருந்து நேரடித் தேர்தல் மூலம் தேர்ந்தெடுக்கப்படும் உறுப்பினர்களின் எண்ணிக்கை 815 ஆக நிர்ணயிக்க மசோதா முன்மொழிகிறது.

யூனியன் பிரதேசங்களுக்கு, நாடாளுமன்றம் சட்டத்தின் மூலம் வழங்கும் முறையில் தேர்ந்தெடுக்கப்படும் 35 உறுப்பினர்களுக்கு மிகாமல் இருக்க வேண்டும் என்று மசோதா கூறுகிறது.

தற்போது மாநிலங்களிலிருந்து 530 மற்றும் யூனியன் பிரதேசங்களிலிருந்து 20 என மொத்தம் 550 மக்களவை உறுப்பினர்கள் உள்ளனர். எனினும், தொகுதி மறுவரையறை ஆணையம் இந்த எண்ணிக்கையை 543 ஆக நிர்ணயித்திருந்தது.

அரசியலமைப்பின் 81ஆவது பிரிவின் 3ஆவது உட்பிரிவை திருத்தி, மக்கள்தொகை என்ற சொல், நாடாளுமன்றம் சட்டத்தின் மூலம் தீர்மானிக்கும் மக்கள்தொகை கணக்கெடுப்பின்படி, அதன் தொடர்புடைய புள்ளிவிவரங்கள் வெளியிடப்பட்ட மக்கள்தொகையை குறிக்கும் என வரையறுக்க மசோதா முன்மொழிகிறது.

இதன் மூலம் இடங்களின் எண்ணிக்கையை விரிவுபடுத்த எந்த தரவை அடிப்படையாகக் கொள்ளலாம் என்பதை தீர்மானிக்கும் அதிகாரம் நாடாளுமன்றத்துக்கு வழங்கப்படுகிறது.

மத்திய அமைச்சரவை சமீபத்தில் மக்களவை மற்றும் சட்டப்பேரவைகளில் பெண்களுக்கு 33 சதவீத இடஒதுக்கீட்டை விரைந்து அமல்படுத்தவும், மக்களவையில் இடங்களின் எண்ணிக்கையை அதிகரிக்கவும் அரசியலமைப்பை திருத்தும் இந்த மசோதாவுக்கு ஒப்புதல் அளித்தது.

மேலும், மக்களவை மற்றும் சட்டப்பேரவைகளில் சுழற்சி முறையில் இடஒதுக்கீடு அமல்படுத்துவது குறித்தும், மகளிர் இடஒதுக்கீடு எந்த காலத்துக்கு அமலில் இருக்கும் என்பது குறித்தும் மசோதாவில் விவரிக்கப்பட்டுள்ளது. நாடாளுமன்றம் இதை நீட்டிக்கலாம்.

சிறப்பு அமர்வுக்கு முன்னதாக, பாரதிய ஜனதா கட்சி, ஐக்கிய ஜனதா தளம், லோக் ஜனசக்தி கட்சி (ராம் விலாஸ்) மற்றும் காங்கிரஸ் உள்ளிட்ட பல அரசியல் கட்சிகள் தங்கள் இரு அவை எம்.பி.க்களும் கட்டாயம் ஆஜராகி, விவாதத்தின்போது கட்சியின் நிலைப்பாட்டை பின்பற்ற வேண்டும் என மூன்று வரி கொறடா உத்தரவு பிறப்பித்துள்ளன.

Hindusthan Samachar / vidya.b