சென்னை, 18 ஏப்ரல் (ஹி.ச)

கோவை மாவட்டம் பொள்ளாச்சி அடுத்த வால்பாறை மலைப்பாதையில் நடைபெற்ற பேரதிர்ச்சி விபத்தில் சிறுவன் உட்பட 10 பேர் உயிரிழந்துள்ளனர், பலர் படுகாயமடைந்துள்ளதாகவும் தகவல்கள் வெளியாகி பெரும் சோகத்தை ஏற்படுத்தியுள்ளது.

தகவலின்படி, சுற்றுலா பயணிகளுடன் சென்ற வேன் வால்பாறை நோக்கி மலைப்பாதையில் சென்று கொண்டிருந்தபோது, எதிர்பாராத விதமாக கட்டுப்பாட்டை இழந்து கவிழ்ந்ததாக கூறப்படுகிறது. இந்த விபத்தில் சம்பவ இடத்திலேயே சிலர் உயிரிழந்ததுடன், பலர் தீவிர காயங்களுடன் மீட்கப்பட்டு அருகிலுள்ள மருத்துவமனைகளில் அனுமதிக்கப்பட்டுள்ளனர். காயமடைந்தவர்களில் சிலரின் நிலை கவலைக்கிடமாக உள்ளதாகவும் கூறப்படுகிறது.

விபத்து தகவல் கிடைத்ததும், காவல்துறை மற்றும் தீயணைப்பு படையினர் உடனடியாக சம்பவ இடத்திற்கு விரைந்து சென்று மீட்பு பணிகளில் ஈடுபட்டனர்.

பள்ளத்தாக்கு போன்ற கடினமான நிலப்பரப்பில் நடந்ததால் மீட்பு பணிகள் சிரமமாக இருந்ததாக அதிகாரிகள் தெரிவித்துள்ளனர். மேலும், விபத்திற்கான காரணம் குறித்து விசாரணை நடைபெற்று வருகிறது.

இந்த துயர சம்பவம் தொடர்பாக பாஜக மாநில தலைவர் நயினார் நாகேந்திரன் தனது ஆழ்ந்த இரங்கலை தெரிவித்துள்ளார்.

இது குறித்து அவர் எக்ஸ் (X) தளத்தில் வெளியிட்டுள்ள பதிவில்,

கோவை மாவட்டம் பொள்ளாச்சி அடுத்த வால்பாறை மலைப்பாதையில் சுற்றுலா வேன் கவிழ்ந்த விபத்தில் சிறுவன் உட்பட 10 பேர் உயிரிழந்த செய்தி மிகுந்த மன வேதனையளிக்கிறது.

உயிரிழந்தவர்களின் குடும்பத்தாருக்கு என் ஆழ்ந்த இரங்கல்களையும் அனுதாபங்களையும் கனத்த இதயத்துடன் தெரிவித்துக் கொள்கிறேன்.

இம்மீளாத் துயரத்தை கடந்துவர இறைவன் அவர்களுக்கு துணை நிற்கட்டும். மேலும், இவ்விபத்தில் படுகாயமடைந்தவர்கள் விரைவில் முழு உடல் மற்றும் மன ஆரோக்கியத்துடன் குணமடைந்து வீடு திரும்ப இறைவனை வேண்டிக் கொள்கிறேன் என தெரிவித்துள்ளார்.

இந்த விபத்து மாநிலம் முழுவதும் அதிர்ச்சியை ஏற்படுத்தியுள்ள நிலையில், பல்வேறு அரசியல் தலைவர்கள் மற்றும் பொதுமக்கள் சமூக வலைதளங்கள் மூலம் இரங்கலை தெரிவித்து வருகின்றனர்.

Hindusthan Samachar / P YUVARAJ