சென்னை, 24 ஏப்ரல் (ஹி.ச.)

தஞ்சாவூர் மாவட்டம் பாபநாசம் தொகுதியில் நாம் தமிழர் கட்சி சார்பில் போட்டியிட்ட நிறைமாதக் கர்ப்பிணி வேட்பாளர் அனீஸ் பாத்திமா மீது நடைபெற்ற தாக்குதல் தமிழக அரசியல் சூழலை அதிர்ச்சிக்குள்ளாக்கியுள்ளது.

இந்த சம்பவம் குறித்து தமிழக வாழ்வுரிமைக் கட்சி தலைவர் வேல்முருகன் கடும் கண்டனம் தெரிவித்துள்ளார். மாற்று அரசியல் கருத்துகளை ஜனநாயக முறையில் எதிர்கொள்ளாமல், ஒரு கர்ப்பிணிப் பெண்ணை இலக்காகக் கொண்டு வன்முறையில் ஈடுபட்டிருப்பது மனிதாபிமானமற்ற செயல் என அவர் குறிப்பிட்டுள்ளார்.

பெண்களின் பாதுகாப்பும், அவர்களின் அரசியல் உரிமைகளும் பாதுகாக்கப்பட வேண்டியது ஒரு நாகரிக சமூகத்தின் அடிப்படை என்றாலும், இந்த சம்பவம் அதற்கு நேர்மாறான சூழலை உருவாக்கியுள்ளதாக அவர் தெரிவித்துள்ளார்.

குறிப்பாக, கருவில் உள்ள குழந்தையின் உயிருக்கும் ஆபத்தை ஏற்படுத்தக்கூடிய வகையில் இந்த தாக்குதல் நடைபெற்றிருப்பது மிகவும் கவலைக்குரியது என்றும் அவர் கூறியுள்ளார்.

மேலும், தேர்தலில் போட்டியிடும் வேட்பாளர்களுக்கு தேவையான பாதுகாப்பை வழங்குவதில் காவல்துறையும் தேர்தல் ஆணையமும் தவறியுள்ளன என்ற குற்றச்சாட்டும் முன்வைக்கப்பட்டுள்ளது.

இந்த தாக்குதலில் ஈடுபட்டவர்களை உடனடியாக கைது செய்து, கடுமையான சட்ட நடவடிக்கை எடுக்க வேண்டும் என தமிழக வாழ்வுரிமைக் கட்சி வலியுறுத்தியுள்ளது.

Hindusthan Samachar / P YUVARAJ