சென்னை, 26 ஏப்ரல் (ஹி.ச.)

சென்னை மெரினா கடற்கரையில் பெரும் மாற்றங்கள் நடைபெற்று வருகின்றன.

பெருநகர சென்னை மாநகராட்சியின் (GCC) நீலக் கொடி கடற்கரை திட்டத்தின் இறுதிக்கட்ட பணிகள் அடுத்த வாரம் நிறைவடைய உள்ளன.

அதே நேரத்தில், சென்னை பெருநகர் வளர்ச்சி குழுமத்தின் (CMDA) மெரினா மரபு வழித்தட திட்டப் பணிகளும் இறுதிக்கட்டத்தை எட்டியுள்ளன.

மெரினா நீச்சல் குளத்துக்கு பின்புறம் அமைந்துள்ள நீலக் கொடி கடற்கரையின் முதல் கட்டத்தை, துணை முதலமைச்சர் உதயநிதி ஸ்டாலின் 2025 ஆகஸ்ட் மாதம் திறந்து வைத்தார்.

20 ஏக்கர் பரப்பளவில் அமைந்துள்ள இந்தப் பகுதியில் 20 மூங்கில் நிழல் குடில்கள், 40 சாய்வு நாற்காலிகள், 12 சாதாரண நாற்காலிகள், 4 கண்காணிப்பு கோபுரங்கள், 24 குப்பைத் தொட்டிகள், முகப்பு வளைவு, தியான மையம், வாசிப்பு இடம், 2 செல்ஃபி புள்ளிகள், 5 பேரிக்காய் வடிவ நாற்காலிகள் ஆகியவை அமைக்கப்பட்டுள்ளன.

மாற்றுத்திறனாளிகளுக்காக 12 சக்கர நாற்காலிகள் ஏற்பாடு செய்யப்பட்டுள்ளன. மேலும், குழந்தைகளுக்கான 4 விளையாட்டு மண்டலங்கள், 10 தென்னை மரங்கள், தாய்ப்பால் ஊட்டும் அறைகள், சிசிடிவி கண்காணிப்பு, முதலுதவி அறை, ஓய்வறை, ஆண்களுக்கு 2 குளியலறைகள் மற்றும் 7 கழிப்பறைகள், பெண்களுக்கு 1 குளியலறை மற்றும் 4 கழிப்பறைகள், மாற்றுத்திறனாளிகளுக்கு 1 கழிப்பறை ஆகியவையும் உள்ளன.

‘வாட்டர் ஏடிஎம்’ மூலம் சுத்தமான குடிநீர் வழங்கப்படுகிறது.

முதல் கட்டத்தைத் தொடர்ந்து, கலங்கரை விளக்கத்தை நோக்கி மேலும் 3 கட்டங்களாக 97 ஏக்கர் பரப்பளவில் இந்தத் திட்டத்தை மாநகராட்சி விரிவுபடுத்தியது.

மாநகராட்சி அதிகாரிகள் கூறுகையில்,

2 மற்றும் 3-ம் கட்டப் பணிகள் நிறைவடைந்துள்ளன. 4-ம் கட்டப் பணிகள் அடுத்த வாரம் முடிவடையும். தேர்தல் நடத்தை விதிகள் விலக்கிக் கொள்ளப்பட்ட பிறகு முறையான திறப்பு விழா நடைபெறும்.

என்று கூறினர் .

இதற்கு இணையாக, சிஎம்டிஏ சார்பில் ரூ.18.45 கோடி மதிப்பில் மெரினா மரபு வழித்தட திட்டம் செயல்படுத்தப்பட்டு வருகிறது. உழைப்பாளர் சிலையில் இருந்து கலங்கரை விளக்கம் வரை இந்தத் திட்டம் செயல்படுத்தப்படுகிறது.

இத்திட்டத்தின் கீழ் 2.31 கி.மீ நீள செயற்கை மிதிவண்டி பாதை மற்றும் சென்னைப் பல்கலைக்கழகம், மாநிலக் கல்லூரி, விவேகானந்தர் இல்லம் போன்ற வரலாற்றுச் சிறப்புமிக்க இடங்களுக்கு எதிரே 9 பார்வைத் தளங்கள் அமைக்கப்படுகின்றன.

மேலும், 9 புதிய பேருந்து நிறுத்தங்கள், காவல் சாவடிகள், நவீன பொலார்டு விளக்குகள் ஆகியவையும் இத்திட்டத்தில் இடம்பெற்றுள்ளன.

இந்த இரு திட்டங்களும் நிறைவடையும்போது மெரினா கடற்கரை சர்வதேச தரத்தில் மேம்படும் என எதிர்பார்க்கப்படுகிறது.

Hindusthan Samachar / vidya.b