சென்னை, 26 ஏப்ரல் (ஹி.ச)

பெங்களூரு கன்டோன்மென்ட் மற்றும் வைட்ஃபீல்டு ரயில் நிலையங்களில் நடைபெறும் நடைமேடை சீரமைப்பு பணிகள் காரணமாக, மே 29 முதல் ஜூலை 7 வரை சென்னை–பெங்களூரு இடையேயான 10-க்கும் மேற்பட்ட ரயில் சேவைகளும், இந்த வழித்தடத்தில் செல்லும் பல நீண்டதூர ரயில்களும் பாதிக்கப்படவுள்ளன.

சென்னை–பெங்களூரு மற்றும் சென்னை–மைசூரு வழித்தடங்களில் இயக்கப்படும் முக்கிய ரயில்கள் ஜூன் 3 முதல் ஜூலை 7 வரை குறிப்பிட்ட நாட்களில் ரத்து செய்யப்படுகின்றன.

சென்னை சென்ட்ரல்–அசோகபுரம் காவேரி எக்ஸ்பிரஸ் மற்றும் அதன் மறுமார்க்க சேவை, சென்னை–பெங்களூரு சூப்பர்ஃபாஸ்ட் மெயில், யஸ்வந்த்பூர்–சென்னை சூப்பர்ஃபாஸ்ட் எக்ஸ்பிரஸ், மைசூரு–சென்னை சூப்பர்ஃபாஸ்ட் எக்ஸ்பிரஸ் மற்றும் பெங்களூரு–ஜோலார்பேட்டை இடையேயான மெமு சேவைகள் ரத்து செய்யப்படும் ரயில்களில் அடங்கும்.

ரத்து தவிர, மே 29, ஜூன் 2, ஜூன் 7, ஜூன் 19, ஜூன் 23 மற்றும் ஜூலை 3 ஆகிய தேதிகளில் பல ரயில்கள் மறு நேரமிடப்பட்டு இயக்கப்படவுள்ளன. இந்த ரயில்கள் 30 நிமிடங்கள் முதல் 3 மணி நேரம் வரை தாமதமாக புறப்படும்.

மைசூரு–ரேணிகுண்டா சூப்பர்ஃபாஸ்ட் எக்ஸ்பிரஸ், எஸ்.எம்.வி.டி பெங்களூரு–நியூ தின்சுகியா எக்ஸ்பிரஸ், காவேரி எக்ஸ்பிரஸ் மற்றும் ஹட்டியா–பெங்களூரு எக்ஸ்பிரஸ் ஆகியவை இதில் பாதிக்கப்படும் சேவைகளாகும்.

மேலும், ஜூன் மற்றும் ஜூலை மாதங்களில் குறிப்பிட்ட நாட்களில் பல நீண்டதூர ரயில்கள் மாற்றுப் பாதையில் திருப்பிவிடப்படவுள்ளன.

இந்த ரயில்கள் காட்பாடி, ஜோலார்பேட்டை, ரேணிகுண்டா, அரக்கோணம் மற்றும் பெரம்பூர் போன்ற முக்கிய சந்திப்புகளைத் தவிர்த்துச் செல்லும்.

மைசூரு–ஹவுரா எக்ஸ்பிரஸ், எஸ்.எம்.வி.டி பெங்களூரு–குவாஹாட்டி எக்ஸ்பிரஸ், ஹட்டியா–பெங்களூரு எக்ஸ்பிரஸ், தாதர்–புதுச்சேரி எக்ஸ்பிரஸ் மற்றும் எர்ணாகுளம்–பெங்களூரு வந்தே பாரத் ஆகிய சேவைகள் இதனால் பாதிக்கப்படுகின்றன.

கூடுதலாக, ஜூலை 7 அன்று ஜோலார்பேட்டை–கே.எஸ்.ஆர் பெங்களூரு மெமு ரயில் பகுதியளவில் ரத்து செய்யப்படுகிறது.

அன்று இந்த ரயில் தேவனகொந்தி வரை மட்டுமே இயக்கப்படும் என்று ரயில்வே நிர்வாகம் தெரிவித்துள்ளது.

Hindusthan Samachar / vidya.b