புதுடெல்லி, 29 ஏப்ரல் (ஹி.ச.)

தேசிய தலைநகர் புதுடெல்லியின் பல பகுதிகளில் இன்று அதிகாலை முதலே மழை கொட்டித்தீர்த்தது. தாழ்வாக திரண்ட மேகங்கள் வானத்தை மூடியிருந்தன.

இந்த மழைப்பொழிவு வெப்பநிலையைக் குறைத்ததுடன், தொடர்ந்து நிலவிய புழுக்கத்தையும் தணித்தது.

குஷாக் சாலை, லூடியன்ஸ் டெல்லி உள்ளிட்ட நகரின் பல பகுதிகளில் திடீர் வானிலை மாற்றம் காரணமாக கருமேகங்கள் சூழ்ந்து, பலத்த காற்றுடன் இதமான மழை பெய்தது. கடந்த சில நாட்களாக 42°C முதல் 45°C வரை வெப்பம் பதிவானதால், நகரம் “மஞ்சள் எச்சரிக்கை”யின் கீழ் இருந்தது.

இந்திய வானிலை ஆய்வு மையம் (IMD) ஏற்கனவே மேற்கத்திய இடையூறு காரணமாக வானிலையில் மாற்றம் ஏற்படும் என கணித்திருந்தது.

இதன் காரணமாக வெப்பநிலை வேகமாக குறைந்தது.

41°C ஆக இருக்கும் என எதிர்பார்க்கப்பட்ட அதிகபட்ச வெப்பநிலை, மழைக்குப் பின் சுமார் 38°C ஆக குறையும் என கணிக்கப்பட்டுள்ளது.

புதுடெல்லியில் உள்ள மண்டல வானிலை முன்னறிவிப்பு மையம் (RWFC) தெரிவித்ததாவது:

டெல்லி மற்றும் தேசிய தலைநகர் பிராந்தியம் முழுவதும், அதோடு ஹரியானா,

உத்தரப்பிரதேசம், ராஜஸ்தானின் அருகிலுள்ள பகுதிகளிலும் காலை நேரங்களில் இடியுடன் கூடிய மிதமானது முதல் லேசான மழையும், மின்னலும், மணிக்கு 30-40 கி.மீ வேகத்தில் பலத்த காற்றும் வீச வாய்ப்புள்ளது.

மேலும், ஹரியானாவின் ராஜவுண்ட், அசந்த், சஃபிடான், பர்வாலா, ஜிந்த், பானிபட், ஹிசார், கோஹானா, கன்னூர், ஹன்சி, சிவானி, மெஹம், தோஷம், பிவானி, லோஹாரு மற்றும் ஷாம்லி உள்ளிட்ட பல இடங்களில் லேசான மழை பெய்ய வாய்ப்புள்ளதாகவும் வானிலை முன்னறிவிப்பு மையம் தெரிவித்தது.

பலத்த காற்றும், விட்டுவிட்டு பெய்த மழையும் டெல்லியின் வானிலையில் குறிப்பிடத்தக்க மாற்றத்தை ஏற்படுத்தி, சமீபத்திய வெப்ப அலை நிலைமைகளில் இருந்து மக்களுக்கு நிவாரணம் அளித்தது.

மழைக்குப் பின் குஷாக் சாலையில் மேகமூட்டமான வானமும், நனைந்த சாலைகளும் காணப்பட்டன.

இதற்கிடையில், மத்திய மாசு கட்டுப்பாட்டு வாரியத்தின் (CPCB) தரவுகளின்படி,

டெல்லியின் காற்று தரக் குறியீடு 260 ஆக பதிவாகியுள்ளது.

இது “மோசமான” பிரிவில் வருகிறது.

Hindusthan Samachar / vidya.b