விசாகப்பட்டினம், 03 ஏப்ரல் (ஹி.ச.)

இந்தியக் கடற்படையின் மேம்பட்ட மறைமுகத் தாக்குதல் போர்க்கப்பலான ஐஎன்எஸ் தரகிரி, இன்று நடைபெறும் விழாவில் அதிகாரப்பூர்வமாக சேவையில் இணைக்கப்பட உள்ளது.

இந்த நிகழ்ச்சியில் பாதுகாப்புத்துறை அமைச்சர் ராஜ்நாத் சிங் பங்கேற்பார் என எதிர்பார்க்கப்படுகிறது. விழாவை கடற்படைத் தலைவர் அட்மிரல் தினேஷ் குமார் திரிபாதி தலைமையேற்கிறார்.

இந்தோ-பசிபிக் பிராந்தியத்தில் இந்தியாவின் அதிகரித்துவரும் ஈடுபாடும், மாறிவரும் பாதுகாப்பு சூழலும் பின்னணியாக, கிழக்குக் கடற்கரையின் முக்கியத்துவம் உயரும் நிலையில் தரகிரியின் இணைப்பு நடைபெறுகிறது. இது, கடற்படையின் போர் தயார்நிலையும் செயல்திறனும் மேம்படுத்தப்படுவதை வெளிப்படுத்துகிறது.

திட்டம் 17A வகை கப்பல்களில் நான்காவதாகும் தரகிரி, சுமார் 6,670 டன் எடையுடையது. ‘மேக் இன் இந்தியா’ முயற்சியின் அடையாளமாகவும், உள்நாட்டு கப்பல் கட்டுமான திறன்களின் முன்னேற்றத்தையும் இது பிரதிபலிக்கிறது.

மும்பையில் செயல்படும் மசாகான் டாக் ஷிப் பில்டர்ஸ் லிமிடெட் (MDL) நிறுவனத்தால் கட்டப்பட்ட இந்தக் கப்பல், முந்தைய வடிவமைப்புகளை விட ஒரு தலைமுறை முன்னேற்றமாக கருதப்படுகிறது. குறைந்த ரேடார் அடையாளத்துடன் கூடிய வடிவமைப்பு, அதற்கு உயர்ந்த மறைநிலை செயல்திறனை வழங்குகிறது. 75 சதவீதத்திற்கும் மேலான உள்நாட்டு கூறுகள் பயன்படுத்தப்பட்டுள்ள இந்தக் கப்பல், 200-க்கும் மேற்பட்ட குறு, சிறு மற்றும் நடுத்தர தொழில்முனைவோர் நிறுவனங்களின் பங்களிப்பை உள்ளடக்கியது.

டீசல் அல்லது எரிவாயு (CODOG) உந்துவிசை அமைப்புடன் இயங்கும் தரகிரி, அதிவேகமும் நீண்டநேர செயல்திறனும் கொண்டதாக வடிவமைக்கப்பட்டுள்ளது. அதன் ஆயுத அமைப்பில், மீயொலி வேக ஏவுகணைகள், நடுத்தர தூர வான் பாதுகாப்பு ஏவுகணைகள் மற்றும் நீர்மூழ்கிக் கப்பல் எதிர்ப்பு அமைப்புகள் இடம்பெற்றுள்ளன. இவை அனைத்தும் ஒருங்கிணைந்த போர் மேலாண்மை அமைப்பின் கீழ் செயல்படுகின்றன.

போர் நடவடிக்கைகளுக்கு அப்பாற்பட்டு, மனிதாபிமான உதவி மற்றும் பேரிடர் நிவாரணப் பணிகளிலும் (HADR) ஈடுபடக் கூடிய வகையில் தரகிரி வடிவமைக்கப்பட்டுள்ளது. இதன் பல்துறை திறன், நவீன கடல்சார் தேவைகளுக்கு ஏற்ப அமைந்துள்ளது.

இந்தியக் கடற்படை, உள்நாட்டில் வடிவமைக்கப்பட்டு, கட்டப்பட்டு, இயக்கப்படும் கப்பல்களால் வலுப்பெறும் தற்சார்பு படையாக உருவெடுத்து வருகிறது.

அந்த வளர்ச்சியின் புதிய அடையாளமாக, நாட்டின் கடல் பாதுகாப்பில் முக்கிய பங்கு வகிக்க தரகிரி தயாராக உள்ளது.

Hindusthan Samachar / JANAKI RAM