வேலூர், 07 ஏப்ரல் (ஹி.ச.)

வேலூர் மாவட்டம் காட்பாடி பகுதியில்

நேற்று காட்பாடி சட்டமன்றத் தொகுதியில் அதிமுக வேட்பாளர் ராமு தேர்தல் பிரச்சாரத்தின் ஒரு பகுதியாக ஊர்வலமாக சென்றார்.

இந்த ஊர்வலத்தின் போது அதிகமானோர் திரண்டதால் அப்பகுதியில் போக்குவரத்து பாதிப்பு ஏற்பட்டதாக கூறப்படுகிறது.

மேலும், ஊர்வலத்தின் போது பட்டாசுகள் வெடிக்கப்பட்டதால் பொதுமக்கள் மற்றும் வாகன ஓட்டிகளுக்கு இடையூறு ஏற்பட்டதாகவும் தெரிவிக்கப்பட்டுள்ளது.

இந்த சம்பவத்தை தொடர்ந்து தேர்தல் பறக்கும் படையினர் கவனத்தில் கொண்டு காட்பாடி காவல் நிலையத்தில் புகார் அளித்தனர்.

துணை வட்டார வளர்ச்சி அலுவலர் (தணிக்கை) விஸ்வநாதன் அளித்த புகாரின் அடிப்படையில் போலீசார் நடவடிக்கை எடுத்துள்ளனர்.

புகாரின் பேரில், தேர்தல் விதிமுறைகளை மீறி அனுமதியின்றி ஊர்வலம் நடத்துதல், பட்டாசு வெடித்தல் மூலம் பொதுமக்கள் மற்றும் போக்குவரத்துக்கு பாதிப்பு ஏற்படுத்துதல் உள்ளிட்ட குற்றச்சாட்டுகளின் கீழ் வழக்கு பதிவு செய்யப்பட்டுள்ளது. BNS சட்டத்தின் 189(2), 288 மற்றும் 292 பிரிவுகளின் கீழ் இந்த வழக்கு பதிவு செய்யப்பட்டுள்ளதாக போலீசார் தெரிவித்துள்ளனர்.

இந்த வழக்கில் காட்பாடி தொகுதி அதிமுக வேட்பாளர் ராமு, திருமால், பாமக மாவட்ட செயலாளர் மற்றும் பாஜக மாவட்ட தலைவர் தசரதன் ஆகிய நான்கு பேரும் குற்றச்சாட்டில் இணைக்கப்பட்டுள்ளனர். சம்பவம் தொடர்பாக மேலதிக விசாரணை நடைபெற்று வருகிறது.

தேர்தல் காலத்தில் விதிமுறைகளை கடைப்பிடிக்க வேண்டும் என்ற அதிகாரிகளின் எச்சரிக்கைகள் தொடர்ந்தும் வலியுறுத்தப்பட்டு வரும் நிலையில், இத்தகைய சம்பவங்கள் அரசியல் வட்டாரத்தில் கவனத்தை ஈர்த்து வருகின்றன.

Hindusthan Samachar / ANANDHAN