புது டெல்லி, 07 ஏப்ரல் (ஹி.ச.)

இந்தியா தனது சிவில் அணுசக்தி திட்டத்தில் நீண்டநாளாக எதிர்பார்த்த முக்கிய மைல்கல்லை திங்கள்கிழமை எட்டியுள்ளது.

நாட்டின் மிகவும் முன்னேற்றமான அணு உலைகளில் ஒன்றான தமிழ்நாட்டின் கல்பாக்கத்தில் உள்ள Prototype Fast Breeder Reactor (PFBR) ‘கிரிட்டிக்காலிட்டி’ நிலையை அடைந்துள்ளது. இதன் மூலம் நிலையான அணு பிளவு சங்கிலி வினை தொடங்கப்பட்டதையும், முழுமையான செயல்பாட்டிற்கு இன்னும் ஒரு முக்கியமான படி முன்னேறியதையும் குறிக்கிறது.

இந்த முன்னேற்றத்தை அறிவித்த பிரதமர் நரேந்திர மோடி, இதை இந்தியாவின் அணுசக்தி பயணத்தில் ஒரு முக்கிய திருப்புமுனையாக வர்ணித்தார்.

இன்று, இந்தியா தனது சிவில் அணுசக்தி பயணத்தில் ஒரு முக்கியமான முன்னேற்றத்தை எடுத்து, அணுசக்தி திட்டத்தின் இரண்டாம் கட்டத்தை முன்னேற்றுகிறது.

கல்பாக்கத்தில் உள்ள நாட்டிலேயே வடிவமைக்கப்பட்டு உருவாக்கப்பட்ட Prototype Fast Breeder Reactor கிரிட்டிக்காலிட்டி நிலையை அடைந்துள்ளது,என்று அவர் தெரிவித்துள்ளார்.

மேலும், இந்த சாதனை “நமது அறிவியல் திறனின் ஆழத்தையும், பொறியியல் திறனின் வலிமையையும் காட்டுகிறது” என்றும், எதிர்காலத்தில் இந்தியாவின் பரந்த அளவிலான தோரியம் வளங்களை பயன்படுத்தும் பாதையை திறக்கிறது என்றும் கூறினார்.

அணு அறிவியல் சொல்லாட்சியில் ‘கிரிட்டிக்காலிட்டி’ என்பது, ஒரு அணு உலை தன்னிச்சையான அணு பிளவு சங்கிலி வினையை அடையும் நிலையை குறிக்கிறது.

இதில் உருவாகும் நியூட்ரான்கள் எண்ணிக்கை, வெளிப்புற உதவி இல்லாமல் வினை தொடர போதுமானதாக இருக்கும்.

இது உலை முழு திறனில் மின்சாரம் உற்பத்தி செய்கிறது என்பதைக் குறிக்காது என்றாலும், எந்த அணு நிலையத்தின் தொடக்க கட்டத்தில் மிக முக்கியமான நிலையாகும்.

500 மெகாவாட் மின்சார திறன் கொண்ட, சோடியம் குளிரூட்டப்பட்ட இந்த வேகப் பெருக்கி அணு உலை (Fast Breeder Reactor) உருவாக்கம் இரண்டு தசாப்தங்களுக்கு மேலாக நீடித்துள்ளது. இது இந்தியாவின் அணுசக்தி துறையில் மிகச் சிக்கலான பொறியியல் மற்றும் பொருள் தொழில்நுட்ப சவால்களை உள்ளடக்கியதாகும். இந்த உலை, அணு ஆற்றல் துறையின் கீழ் செயல்படும் பாரதிய நாபிகிய வித்யுத் நிகம் லிமிடெட் (BHAVINI) நிறுவனத்தால், கல்பாக்கத்தில் உள்ள இந்திரா காந்தி அணு ஆராய்ச்சி மையத்தில் (IGCAR) உருவாக்கப்பட்டு இயக்கப்படுகிறது.

இந்த சாதனையை இந்தியாவின் அமைதியான அணுசக்தி திட்டத்தில் ஒரு வரலாற்றுச் சாதனையாகக் குறிப்பிடும் வகையில், அணுசக்தி ஆணையத்தின் தலைவர் மற்றும் அணு ஆற்றல் துறை செயலாளர் டாக்டர் அஜித் குமார் மோகந்தி தெரிவித்தார்.

கல்பாக்கத்தில் உள்ள PFBR முதல் கிரிட்டிக்காலிட்டியை அடைந்துள்ளது என்றும், இது ஹோமி ஜெஹாங்கீர் பாபா வடிவமைத்த மூன்று கட்ட அணுசக்தி திட்டத்தின் இரண்டாம் கட்டத்திற்குள் இந்தியா நுழைந்ததை குறிக்கிறது என்றும் கூறினார்.

மேலும் அவர் கூறுகையில், இந்த PFBR, முதல் கட்டத்தில் பயன்படுத்தப்பட்ட பிரஷரைஸ் செய்யப்பட்ட ஹெவி வாட்டர் ரியாக்டர்களிலிருந்து மீள்சுழற்சி செய்யப்பட்ட எரிபொருளில் இருந்து பெறப்பட்ட பிளவுபடும் பொருளை பயன்படுத்துகிறது. இது பயன்படுத்தும் அளவைக் காட்டிலும் அதிக எரிபொருளை உருவாக்கும் திறன் கொண்டது.

இந்த உலையில் உருவாகும் பயன்படுத்தப்பட்ட எரிபொருள் மீண்டும் சுத்திகரிக்கப்பட்டு உலையில் பயன்படுத்தப்படும். இதன் மூலம் இரண்டாம் கட்ட எரிபொருள் சுழற்சி முழுமையடையும்.

இது மூன்றாம் கட்டமான தோரியம் அடிப்படையிலான அணு உலைகளுக்கான பாதையை அமைக்கும்.

வேகப் பெருக்கி அணு உலைகள், பாரம்பரிய அணு உலைகளிலிருந்து முற்றிலும் வேறுபட்டவை. சாதாரண அணு உலைகள் யூரேனியத்தை பயன்படுத்தும் நிலையில், இவை ப்ளூட்டோனியத்தை பயன்படுத்தி, யூரேனியம்-238 ஐ ப்ளூட்டோனியம்-239 ஆக மாற்றி கூடுதல் எரிபொருளை உருவாக்கும். இதனால் PFBR “அக்ஷய பாத்திரம்” போன்ற முடிவில்லாத ஆற்றல் மூலமாக கருதப்படுகிறது.

உலகளவில் தற்போது ரஷ்யா மட்டுமே வணிக ரீதியாக செயல்படும் வேகப் பெருக்கி அணு உலையை இயக்குகிறது. இதனால் இந்த சாதனை தொழில்நுட்ப ரீதியாக மிக உயர்ந்ததாகும்.

PFBR கிரிட்டிக்காலிட்டி நிலையை அடைந்தது, இந்தியாவின் மூன்று கட்ட அணுசக்தி திட்டத்தின் இரண்டாம் கட்டம் தொடங்கியதை உறுதிப்படுத்துகிறது.

இந்த கட்டத்தில், முதல் கட்ட உலைகளில் உருவாகும் ப்ளூட்டோனியம் பயன்படுத்தப்படுகிறது. இது மூன்றாம் கட்டமான தோரியம் அடிப்படையிலான உலைகளுக்கான வழியை அமைக்கிறது.

இந்த முன்னேற்றம், இந்தியாவின் சுற்றுச்சூழல் மற்றும் ஆற்றல் இலக்குகளுடனும் இணைகிறது. 2047ஆம் ஆண்டுக்குள் 100 கிகாவாட் அணுசக்தி உற்பத்தி திறனை அடைவதே அரசின் நோக்கம். குறைந்த கார்பன் வெளியீடு மற்றும் தூய்மையான ஆற்றலை நோக்கி செல்லும் முயற்சியில் PFBR போன்ற உலைகள் முக்கிய பங்காற்றும்.

முழுமையாக செயல்படத் தொடங்கிய பின், PFBR இந்தியாவில் வேகப் பெருக்கி தொழில்நுட்பத்தின் வணிக பயன்பாட்டை நிரூபிக்கும். மேலும், எதிர்கால அணு உலைகளுக்கான மாதிரியாகவும் இருக்கும்.

இந்த சாதனையை தேசிய பெருமை எனக் குறிப்பிட்ட பிரதமர், இந்திய விஞ்ஞானிகள் மற்றும் பொறியாளர்களுக்கு வாழ்த்து தெரிவித்தார்.

இந்தியா பெருமைப்பட வேண்டிய தருணம் இது. நமது விஞ்ஞானிகளுக்கும் பொறியாளர்களுக்கும் என் வாழ்த்துகள், என்று அவர் கூறினார்.

Hindusthan Samachar / Dr. Vara Prasada Rao PV