கோவை, 08 ஏப்ரல் (ஹி.ச.)

கோவை பிஎஸ்ஜி தொழில்நுட்பக் கல்லூரியில் ஆண்டுதோறும் நடைபெறும் முன்னணி நிகழ்வான 'டெக் டே 2026', எஃப்-பிளாக் அரங்கில் கொண்டாடப்பட்டது.

இந் நிகழ்வில்,இந்திய விண்வெளி ஆராய்ச்சி நிறுவனம் (ISRO), பெங்களூரு, லெபாரட்டரி ஃபார் எலக்ட்ரோ-ஆப்டிக்ஸ் சிஸ்டம்ஸ் (LEOS)-இன் இயக்குநர் டாக்டர் கே. வி. ஸ்ரீராம் விழாவில் சிறப்பு விருந்தினராகக் கலந்துகொண்டார்.

பிஎஸ்ஜி தொழில்நுட்பக் கல்லூரி முதல்வர் டாக்டர் கே. பிரகாசன் விழாவிற்குத் தலைமை வகித்தார்.

பிஎஸ்ஜி தொழில்நுட்பக் கல்லூரியின் ஆண்டு விழா நிகழ்வின் பகுதியாக, பல்வேறு தரப்புகளுக்கான விருதுகள் வழங்கப்பட்டு கல்லூரி உறுப்பினர்கள் சிறப்பிக்கப்பட்டனர்.

அர்ப்பணிப்புடன் பல ஆண்டுகள் பணியாற்றிய ஓய்வு பெற்ற பேராசிரியர்கள் கௌரவிக்கப்பட்டதுடன் பாடத்திட்டம், வழிகாட்டுதல், மற்றும் கல்வித் தலைமையில் சிறந்து விளங்கிய பேராசிரியர்களுக்கு

“சிறந்த ஆசிரியர் விருதுகள்” வழங்கப்பட்டன.

கல்வி, விளையாட்டு, சமூகப் பணிகள் மற்றும் தலைமைத்துவம் உள்ளிட்ட துறைகளில் சாதனையாற்றிய மாணவர்கள் கௌரவிக்கப்பட்டனர்.

கல்லூரியின் உயரிய விருதான 'கூரத்தாழ்வார் விருது', இறுதியாண்டு B.E. மின்துறை மற்றும் மின்னணு பொறியியல் (EEE) மாணவர் மேகலன் (22E132) அவர்களுக்கு வழங்கப்பட்டது.

இந்த விருதில் வெள்ளி பதக்கம், கோப்பை மற்றும் ₹10,000 பரிசு ஆகியவை அடங்கும்.

சிறப்பு விருந்தினர் டாக்டர் கே. வி. ஸ்ரீராம், மாணவர்கள் சவால்களை தைரியமாக எதிர்கொண்டு வெற்றி பெறவேண்டும் எனத் தன் உரையில் வலியுறுத்தினார்.

சர் சி. வி. ராமன், டாக்டர் ஏ. பி. ஜே. அப்துல் கலாம், மற்றும் தாமஸ் ஆல்வா எடிசன் போன்ற மாமேதைகளின் ஞானத்தையும் படைப்பாற்றல் உணர்வையும் அவர் சிறப்பித்துப் பேசினார். மேலும், ISRO-வில் உள்ள வாய்ப்புகளை எடுத்துரைத்து, இளம் பெண்கள் தங்கள் திறமைகளை வளர்த்துக்கொள்ள ஊக்குவித்தார்.

பிஎஸ்ஜி தொழில்நுட்பக் கல்லூரி நிறுவன தினம், கல்விச் சாதனைகள், ஆராய்ச்சிகள், தேசிய மற்றும் சர்வதேச மாநாடுகள் உள்ளிட்ட முக்கிய நிகழ்வுகள் அடங்கிய காணொளி விழாவில் திரையிடப்பட்டது.

டெக் டே விழா 2026, பிஎஸ்ஜி தொழில்நுட்பக் கல்லூரியின் பவள விழா ஆண்டில் ஒரு முக்கிய மைல்கல்லாக அமைந்ததுடன், அதன் அர்ப்பணிப்பையும் முன்னிலைப்படுத்தியது.

Hindusthan Samachar / ANANDHAN