சென்னை, 01 மே (ஹி.ச.)

சர்வதேச தொழிலாளர் தினமான மே 1-ஐ முன்னிட்டு, தமிழக முதலமைச்சரும், திமுக தலைவருமான மு.க.ஸ்டாலின் சென்னை சிந்தாதிரிப்பேட்டையில் உள்ள மே தின பூங்காவில் மே தின நினைவுச் சின்னத்தில் மலரஞ்சலி செலுத்தினார்.

உலகம் முழுவதும் தொழிலாளர் உரிமைகள் மற்றும் சமத்துவத்திற்காக போராடியோரின் நினைவாகக் கொண்டாடப்படும் இந்த நாளில், தொழிலாளர்களின் தியாகங்களையும் சாதனைகளையும் முதல்வர் நினைவுகூர்ந்தார்.

மேலும், தொழிலாளர் நலனைக் காக்க தமிழக அரசு தொடர்ந்து உறுதிபூண்டுள்ளதாகவும், கட்டுமான தொழிலாளர்கள், தொழிற்சாலை பணியாளர்கள், ஒழுங்கற்றத் துறையில் பணிபுரிபவர்கள் உள்ளிட்ட அனைத்து தரப்பு தொழிலாளர்களுக்கும் சமூகப் பாதுகாப்பு திட்டங்கள் வலுப்படுத்தப்பட்டு வருவதாகவும் தெரிவித்தார்.

தமிழகத்தில் தொழிலாளர்களுக்கான பல்வேறு நலத்திட்டங்கள்—உதவித்தொகை, மருத்துவ காப்பீடு, ஓய்வூதியம், குழந்தைகளுக்கான கல்வி உதவி உள்ளிட்டவை—மேலும் விரிவுபடுத்தப்படும் என்றும் கூறப்பட்டது.

இந்த நிகழ்வில் அமைச்சர்கள், மக்கள் பிரதிநிதிகள், திமுக நிர்வாகிகள் மற்றும் தொழிலாளர் சங்க பிரதிநிதிகள் கலந்து கொண்டு மரியாதை செலுத்தினர்.

மே தினத்தையொட்டி தமிழக அரசு சார்பில் பல்வேறு விழிப்புணர்வு நிகழ்ச்சிகளும், தொழிலாளர் நலத் திட்ட அறிவிப்புகளும் நடைபெற்று வருகின்றன என்பது குறிப்பிடத்தக்கது.

Hindusthan Samachar / GOKILA arumugam