Enter your Email Address to subscribe to our newsletters
நியூயார்க், 11 மே (ஹி.ச.)
ஈரான் மீதான அமெரிக்கா மற்றும் இஸ்ரேலின் போர் பிப்ரவரி 28 அன்று தொடங்கியது.
ஏப்ரல் 8-ம் தேதி போரிடும் தரப்புகள் போர்நிறுத்தத்திற்கு ஒப்புக்கொண்டதிலிருந்து தாக்குதல்கள் நிறுத்தி வைக்கப்பட்டுள்ளன.
பகைமையை முற்றிலுமாக முடிவுக்குக் கொண்டுவர அமெரிக்காவும் ஈரானும் பேச்சுவார்த்தை நடத்தி வருகின்றன. ஆனால் அமைதி இதுவரை எட்டப்படவில்லை.
தடைகளை நீக்குவதற்கும், முடக்கப்பட்ட பில்லியன் கணக்கான ஈரானிய நிதியை விடுவிப்பதற்கும் ஈடாக, யுரேனிய செறிவூட்டும் திட்டத்தை முடிவுக்குக் கொண்டுவருவதற்கு தெளிவான உறுதிப்பாட்டை ஈரான் வழங்க வேண்டும் என்று அமெரிக்கா வலியுறுத்தி வருகிறது.
உலகளாவிய கச்சா எண்ணெய் விநியோகத்தில் ஐந்தில் ஒரு பங்கிற்கான முக்கிய வழியான ஹோர்முஸ் ஜலசந்தி மீதான முற்றுகையை ஈரானும் அமெரிக்காவும் நீக்க வேண்டும் என்பதும் பேச்சுவார்த்தைகளில் அடங்கும்.
இந்த நிலையில் பல மாதங்களாக நீடித்து வரும் போரை முடிவுக்குக் கொண்டுவர ஈரான் அளித்த பரிந்துரையை அமெரிக்க அதிபர் டொனால்ட் டிரம்ப் ‘முற்றிலும் ஏற்க முடியாதது’ எனக் கூறி நிராகரித்துள்ளார்.
ஆனால் அதன் விவரங்களை அவர் வெளியிடவில்லை. இதற்கிடையே, முக்கிய குடியரசுக் கட்சித் தலைவர் ஒருவர் ராணுவ நடவடிக்கை வாய்ப்பை பரிசீலிக்குமாறு அவரை வலியுறுத்தியுள்ளார்.
ஈரானுடனான போரை முடிவுக்குக் கொண்டுவரும் முயற்சிக்கு வழிவகுக்கும் என்ற எதிர்பார்ப்புக்கு மத்தியில், நேற்று டிரம்புக்கு ஈரானின் பரிந்துரை கிடைத்தது.
பிப்ரவரி 28-ம் தேதி தொடங்கிய இந்தப் போர், உலகளாவிய எண்ணெய் விநியோகத்திற்கான முக்கிய கடல் வழியை முடக்கியதால், பல நாடுகளில் எரிபொருள் தட்டுப்பாடு ஏற்பட்டுள்ளது.
ஈரானின் ‘பிரதிநிதிகள் என்று சொல்லிக்கொள்பவர்களின் பதிலை நான் இப்போதுதான் படித்தேன். எனக்கு அது பிடிக்கவில்லை – முற்றிலும் ஏற்க முடியாதது! என்று தனது ட்ரூத் சோஷியல் தளத்தில் டொனால்ட் டிரம்ப் பதிவிட்டுள்ளார்.
முன்னதாக, டெஹ்ரான் கிட்டத்தட்ட 50 ஆண்டுகளாக அமெரிக்காவுடன் விளையாடுவதாக டிரம்ப் குற்றம் சாட்டினார்.
இனிமேல் அவர்கள் சிரிக்க முடியாது! என்றும் அவர் கூறினார்.
அவர்களின் கடிதம் எனக்குப் பிடிக்கவில்லை. அது முறையற்றது. அவர்களின் பதில் எனக்குப் பிடிக்கவில்லை என்று அமெரிக்க ஊடகமான ஆக்ஸியோஸிடம் டிரம்ப் தெரிவித்தார்.
ஆனால் ஈரானின் பதிலில் என்ன இருந்தது என்பது குறித்து மேலும் விவரிக்க மறுத்துவிட்டார்.
Hindusthan Samachar / vidya.b