சோம்நாத், 11 மே (ஹி.ச)

குஜராத் மாநிலத்தின் கிர் சோம்நாத் மாவட்டத்தில் உள்ள பிரபாஸ் பட்டன் பகுதியில், அரபிக்கடலின் ஓரத்தில் அமைந்துள்ள சோம்நாத் கோவில், சிவபெருமானுக்கு அர்ப்பணிக்கப்பட்ட பன்னிரு ஜோதிர்லிங்கத் தலங்களில் முதன்மையானதாகப் போற்றப்படுகிறது.

17 முறை முகலாய மன்னர்களால் சிதிலமடைந்த இந்த கோவில் கடந்த 75 ஆண்டுகளுக்கு முன்பு சர்தார் வல்லபாய் பட்டேல் தலைமையில் புனரமைக்கப்பட்டது.

கோவில் புனரமைக்கப்பட்ட 75 ஆண்டுகளின் நிறைவு விழா இன்று (மே 11) கொண்டாடப்படுகிறது.

அந்த வகையில் சோமநாதர் கோவில் இன்று நடைபெறும் புனரமைக்கப்பட்ட 75 ஆண்டுகளின் நிறைவு விழாவில் கலந்து கொள்வதற்காக நேற்று இரவு குஜராத் வந்தடைந்த பிரதமர் மோடி ஜாம்நகரில் தங்கியிருந்தார்.

இன்று காலை சோம்நாத் வந்தடைந்தபோது அவருக்கு உற்சாகமான வரவேற்பு அளிக்கப்பட்டது.

ஹெலிபேடிலிருந்து கோவிலுக்கு அருகிலுள்ள 'வீர் ஹமீர்ஜி வட்டம்' வரையிலான சுமார் 1.5 கிலோமீட்டர் தூரத்திற்கு, ஆயிரக்கணக்கான மக்கள் சாலையின் இருபுறமும் திரண்டு நின்றனர். அவர்கள் மூவர்ணக் கொடிகளையும் பாஜக கொடிகளையும் அசைத்தவாறு, தேசபக்தி மற்றும் மத ரீதியான முழக்கங்களை எழுப்பி பிரதமரை வரவேற்றனர்.

மேற்கு வங்கம் உள்ளிட்ட பல்வேறு மாநிலங்களைச் சேர்ந்த கலைஞர்கள், இந்தச் சாலை ஊர்வலத்தின்போது பாரம்பரியக் கலை நடனங்களை நிகழ்த்திக் காட்டினர்.

குஜராத் முதலமைச்சர் பூபேந்திர படேல் மற்றும் மாநிலத்தின் மூத்த தலைவர்கள் ஆகியோர், இந்த ஊர்வலத்தின்போது பிரதமருடன் உடன் சென்றனர்.

கோவில் வளாகத்தில், பிரதமர் பல்வேறு மதச் சடங்குகளில் பங்கேற்றார். இதில் 'விசேஷ மகா பூஜை', 'ஜல அபிஷேகம்', 'துவஜ பூஜை' மற்றும் 'மகா பூஜை' ஆகியவை அடங்கும்.

நாடு முழுவதும் உள்ள 11 புனிதத் தலங்களிலிருந்து கொண்டுவரப்பட்ட புனித நீரைக் கொண்டு, ஒரு 'கும்பாபிஷேக' விழாவும் நடத்தப்பட்டது. பக்தி முழக்கங்கள் மற்றும் பிரார்த்தனைகளுக்கு மத்தியில், சம்பிரதாயபூர்வமான கொடியேற்ற விழாவும் வேத முறைப்படியான சடங்குகளும் நிகழ்த்தப்பட்டன.

விழாக் கொண்டாட்டங்களின்போது, ஹெலிகாப்டர்களிலிருந்து கோவில் வளாகத்தின் மீது மலர் இதழ்கள் தூவப்பட்டன.

விழாவின் ஒரு பகுதியாக, மீண்டும் நிர்மாணிக்கப்பட்ட சோம்நாத் கோவிலின் 75-வது ஆண்டு நிறைவை நினைவுகூரும் வகையில், ஒரு சிறப்பு அஞ்சல் தலையையும், ₹75 மதிப்புள்ள நினைவு நாணயத்தையும் பிரதமர் மோடி வெளியிட்டார்.

Hindusthan Samachar / vidya.b