சென்னை, 15 மே (ஹி.ச.)

தமிழக பாரதிய ஜனதா கட்சி தனது முன்னாள் மாநில செய்தித் தொடர்பாளர் ஏ.என்.எஸ். பிரசாத்துக்கு, மாநில பாஜக தலைமை மீது நிதி ஊழல் குற்றச்சாட்டுகளை முன்வைத்ததற்காக ரூ.1 கோடி இழப்பீடு கோரி அக்கட்சி அவதூறு நோட்டீஸ் அனுப்பியுள்ளது.

பாஜக தமிழக சட்டப்பிரிவு தலைவர் ஏ.குமாரகுரு மூலம் இன்று அனுப்பப்பட்டுள்ள இந்த சட்ட நோட்டீஸ், பிரசாத் கடந்த மே 9-ம் தேதி ஒரு நாளிதழிலும், பிற பொதுத் தளங்களிலும் தெரிவித்ததாகக் கூறப்படும் கருத்துகளை இலக்காகக் கொண்டுள்ளது.

நோட்டீஸின்படி, தமிழக சட்டமன்றத் தேர்தலின் போது மாநில நிர்வாகிகள் நிதியை முறைகேடாகப் பயன்படுத்தியதாகவும், சட்டமன்ற உறுப்பினர் சீட்டு ஒதுக்கீட்டுக்காக பணம் வசூலித்ததாகவும், கட்சி நிதியை மது, உணவு மற்றும் தனிப்பட்ட ஆதாயத்திற்காகப் பயன்படுத்தியதாகவும், பிரதமர் நிகழ்ச்சிக்காக ஒதுக்கப்பட்ட பணத்தை திசைதிருப்பியதாகவும், எதிர்க்கட்சிகளுடன் “முறையற்ற அரசியல் தொடர்புகளை” பேணியதாகவும் பிரசாத் குற்றம்சாட்டியுள்ளார்.

ஏ.என்.எஸ். பிரசாத் கட்சியின் மீது முன் வைத்துள்ள குற்றச்சாட்டுகளை பாஜக முற்றிலும் மறுத்துள்ளது. தனது கடுமையான குற்றச்சாட்டுகளுக்கு ஆதரவாக பிரசாத் எந்த ஆவண ஆதாரத்தையோ அல்லது சட்டப்பூர்வமாக நிலைக்கக்கூடிய ஆதாரத்தையோ வழங்கவில்லை என்று நோட்டீஸில் குறிப்பிட்டுள்ளது.

மேலும் சட்ட நடவடிக்கைகளைத் தவிர்க்க, தலைமைக்கு எதிராக இனி எந்தக் குற்றச்சாட்டையும் முன்வைக்கக் கூடாது என்றும், ஏழு நாட்களுக்குள் அதே ஊடகத் தளங்களில் நிபந்தனையற்ற மன்னிப்பு கோர வேண்டும் என்றும், “ஈடுசெய்ய முடியாத நற்பெயருக்கு ஏற்பட்ட களங்கம் மற்றும் மன உளைச்சலுக்காக ரூ.1,00,00,000 செலுத்த வேண்டும் என்றும் பாஜக பிரசாத்துக்கு உத்தரவிட்டுள்ளது.

நடிகர்-அரசியல்வாதி விஜய் மற்றும் அவரது கட்சியான தமிழக வெற்றிக் கழகத்தை (டி.வி.கே) தேசிய ஜனநாயகக் கூட்டணியில் இணையுமாறு பகிரங்கமாக வலியுறுத்தியதை அடுத்து பிரசாத் செய்தித் தொடர்பாளர் பதவியில் இருந்து நீக்கப்பட்டார் என்பது குறிப்பிடத்தக்கது.

Hindusthan Samachar / vidya.b