சேலம், 16 மே (ஹி.ச.)

கர்நாடக அணைகளில் இருந்து காவிரியில் திறக்கப்படும் நீரின் அளவு குறைந்துள்ளதால், காவிரி டெல்டா பாசனத்தின் உயிர்நாடியாக விளங்கும் மேட்டூர் அணைக்கு கடந்த இரண்டு நாட்களாக வினாடிக்கு 181 கனஅடி நீர் மட்டுமே வந்து கொண்டிருக்கிறது.

பொதுப்பணித்துறை வெளியிட்டுள்ள புள்ளிவிவரப்படி, நேற்று 79.26 அடியாக இருந்த அணையின் நீர்மட்டம், இன்று காலை நிலவரப்படி 0.10 அடி குறைந்து 79.16 அடியாக பதிவாகியுள்ளது. இதன் காரணமாக அணையின் மொத்த நீர் இருப்பு 41.12 டிஎம்சி-ஆக சரிந்துள்ளது.

அதேநேரம், குடிநீர் தேவைக்காக மேட்டூர் அணையிலிருந்து வினாடிக்கு 1000 கனஅடி நீர் தொடர்ந்து வெளியேற்றப்பட்டு வருகிறது.

அணைக்கு வரும் நீரின் அளவை விட வெளியேற்றப்படும் நீரின் அளவு கிட்டத்தட்ட 5 மடங்கு அதிகமாக இருப்பதால், நீர்மட்டம் படிப்படியாக குறைந்து வருகிறது.

120 அடி உயரமும் 93.47 டிஎம்சி கொள்ளளவும் கொண்ட மேட்டூர் அணையில், தற்போது பாதிக்கும் குறைவான அளவே நீர் உள்ளது.

தென்மேற்கு பருவமழை தீவிரமடைந்து கர்நாடக நீர்ப்பிடிப்பு பகுதிகளில் நல்ல மழை பெய்தால் மட்டுமே நீர்வரத்து அதிகரிக்கும் என நீர்வளத்துறை அதிகாரிகள் தெரிவித்தனர்.

கோடை காலம் தொடங்கவுள்ள நிலையில், டெல்டா மாவட்டங்களின் குடிநீர் மற்றும் பாசனத் தேவைக்கு மேட்டூர் அணை முக்கியம் என்பதால், விவசாயிகள் மற்றும் பொதுமக்கள் அணையின் தினசரி நீர்மட்ட நிலவரத்தை உன்னிப்பாக கவனித்து வருகின்றனர்.

Hindusthan Samachar / vidya.b