சென்னை, 17 மே (ஹி.ச.)

திமுக முன்னாள் எம்எல்ஏ எழிலன் தனது எக்ஸ் வலைதளத்தில் பகிர்ந்துள்ள சினிமா காட்சி ஒன்று அரசியல் மற்றும் சமூக வலைதளங்களில் விவாதத்தை ஏற்படுத்தியுள்ளது.

60 வயதுக்கு மேற்பட்டோர் குறித்து இடம்பெறும் குறும்படக் காட்சியை அவர் பதிவிட்டதைத் தொடர்ந்து, அதன் அரசியல் பின்னணி குறித்து பல்வேறு கருத்துகள் முன்வைக்கப்பட்டு வருகின்றன.

சமீபத்திய சட்டசபைத் தேர்தல் முடிவுகளுக்குப் பிறகு, திமுகவில் தோல்விக்கான காரணங்கள் குறித்து கட்சியின் பல்வேறு நிலை நிர்வாகிகள் மத்தியில் ஆலோசனைகள் நடைபெற்று வருவதாக கூறப்படுகிறது.

கட்சியில் புதிய தலைமுறைக்கு அதிக வாய்ப்பு வழங்க வேண்டும், அமைப்பில் மாற்றங்கள் தேவை என்பன உள்ளிட்ட கருத்துகளும் முன்வைக்கப்பட்டு வருகின்றன.

இந்நிலையில், எழிலன் வெளியிட்ட பதிவு கட்சியின் மூத்த தலைமை மற்றும் நிர்வாக அமைப்பை மறைமுகமாக சுட்டிக்காட்டுவதாக சிலர் சமூக வலைதளங்களில் கருத்து தெரிவித்து வருகின்றனர்.

வெறும் சில விநாடிகள் மட்டுமே கொண்ட அந்தக் காட்சி இணையத்தில் வேகமாக பரவி பேசுபொருளாகியுள்ளது.

குறிப்பிடத்தக்க வகையில், கடந்த தேர்தலில் திமுகவின் முக்கிய தொகுதிகளில் ஒன்றாக கருதப்பட்ட ஆயிரம்விளக்கு தொகுதியில் போட்டியிட்ட எழிலன், தனது எதிரணி வேட்பாளரிடம் தோல்வி அடைந்திருந்தார். இந்த சூழலில் அவரது பதிவு அரசியல் வட்டாரங்களில் கூடுதல் கவனத்தை பெற்றுள்ளது.

Hindusthan Samachar / VINOTH KUMAR P