கின்ஷாசா, 17 மே (ஹி.ச.)

காங்கோ ஜனநாயக குடியரசு மற்றும் உகாண்டாவில் பரவி வரும் எபோலா நோய்ப்பரவலை 'சர்வதேச அக்கறைக்குரிய பொது சுகாதார அவசரநிலை'யாக உலக சுகாதார அமைப்பு இன்று அறிவித்துள்ளது.

தற்போதைய பரவல் புண்டிபுக்யோ வைரஸால் ஏற்பட்டுள்ளது என்று உலக சுகாதார அமைப்பு உறுதிப்படுத்தியுள்ளது. இது தற்போதைக்கு பெருந்தொற்று அவசரநிலைக்கான அளவுகோல்களை பூர்த்தி செய்யவில்லை என்றும் அமைப்பு தெளிவுபடுத்தியுள்ளது.

நேற்றைய அதிகாரப்பூர்வ புள்ளிவிவரங்களின்படி, காங்கோவின் இதுரி மாகாணத்தில் மட்டும் 80 பேர் சந்தேகத்திற்குரிய முறையில் உயிரிழந்துள்ளனர். ஆய்வகத்தில் உறுதி செய்யப்பட்ட 8 பாதிப்புகள் உட்பட, 246 பேருக்கு நோய் அறிகுறிகள் காணப்படுகின்றன.

இதுதவிர, பாதிக்கப்பட்ட பகுதிகளில் இருந்து திரும்பிய பயணிகள் மூலம் உகாண்டாவிலும், காங்கோ தலைநகர் கின்ஷாசாவிலும் புதிய பாதிப்புகள் பதிவாகியுள்ளன.

இது நோய் புவியியல் ரீதியாக பரவும் அபாயத்தை உணர்த்துவதாக சுகாதார நிபுணர்கள் எச்சரிக்கின்றனர்.

எபோலா வைரஸின் ஆறு வகைகளில் ஒன்றான புண்டிபுக்யோ, முதன்முதலில் 2007இல் உகாண்டாவில் கண்டறியப்பட்டது. இது சயீர் வகை எபோலாவை விட இறப்பு விகிதம் குறைவாக இருந்தாலும், வேகமாக பரவக்கூடியது. பாதிக்கப்பட்ட நபரின் ரத்தம், உடல் திரவங்கள் மூலம் நேரடி தொடர்பில் இருப்பவர்களுக்கு எளிதில் பரவும்.

சர்வதேச அவசரநிலை அறிவிப்பை தொடர்ந்து, பாதிக்கப்பட்ட நாடுகளுக்கு தொழில்நுட்ப உதவி, தடுப்பூசி விநியோகம் மற்றும் தொடர்பு தடமறிதல் பணிகளை உலக சுகாதார அமைப்பு தீவிரப்படுத்தியுள்ளது. எல்லை பகுதிகளில் கண்காணிப்பை பலப்படுத்துமாறு அண்டை நாடுகளுக்கும் அறிவுறுத்தப்பட்டுள்ளது.

காங்கோவின் கிழக்கு பகுதி தொடர்ந்து மோதல்கள் மற்றும் இடப்பெயர்வுகளால் பாதிக்கப்பட்டுள்ளதால், நோய்க் கட்டுப்பாட்டு பணிகள் சவாலாக இருப்பதாக கள அதிகாரிகள் தெரிவிக்கின்றனர்.

மத்திய ஆப்பிரிக்காவில் 2018-2020 காலகட்டத்தில் ஏற்பட்ட எபோலா பரவலில் 2,200க்கும் மேற்பட்டோர் உயிரிழந்த நிலையில், மீண்டும் ஒரு பெரிய பரவலை தடுக்க உடனடி நடவடிக்கைகள் தேவை என வல்லுநர்கள் வலியுறுத்துகின்றனர்.

Hindusthan Samachar / vidya.b