பஞ்சாப், 17 மே (ஹி.ச)

இந்திய வானிலை ஆய்வு மையம் (IMD) பஞ்சாப் மற்றும் ஹரியானா மாநிலங்களுக்கு நாளை முதல் ஐந்து நாட்களுக்கு வெப்ப அலை நிலவும் என மஞ்சள் எச்சரிக்கை விடுத்துள்ள நிலையில், பஞ்சாப் பதிண்டா உயிரியல் பூங்காவில் விலங்குகளை அதிகரிக்கும் வெப்பத்திலிருந்து பாதுகாக்க சிறப்பு ஏற்பாடுகள் செய்யப்பட்டுள்ளது.

இது குறித்து பதிண்டா கால்நடை பராமரிப்புத் துறையின் உதவி இயக்குநர் டாக்டர் விஜய் குமார் கூறுகையில்,

விலங்குகளின் சுகாதார சேவைகளுக்கு எங்கள் துறை பொறுப்பாகும். வெப்ப அலையின் பாதகமான விளைவுகள் குறித்து நாங்கள் அறிவுறுத்தல்களை வெளியிட்டுள்ளோம்.

புதிய விலங்குகளை பொது வளாகத்தில் சேர்ப்பதற்கு முன், அவை சுற்றுச்சூழலுடன் பழகுவதற்காக தனிமைப்படுத்தும் நடைமுறைகள் உட்பட அனைத்து நெறிமுறைகளையும் வனத்துறை கண்டிப்பாக பின்பற்றுகிறது. விலங்குகளுக்கு தொடர்ந்து தண்ணீர் கிடைப்பது உறுதி செய்யப்பட்டுள்ளது.

வெப்பமான காலநிலையில் ஆற்றலை சேமிக்க காலை மற்றும் மாலை நேரங்களில் உணவு வழங்கப்படுகிறது. நோய்வாய்ப்பட்ட வனவிலங்குகளுக்கு பாதுகாப்பு மற்றும் உடனடி சிகிச்சை அளிப்பதை உறுதி செய்ய கால்நடை மருத்துவ அதிகாரிகள் உயிரியல் பூங்காவில் நிறுத்தப்பட்டுள்ளனர்.

என்று கூறினார்.

இதே போல் நாளை (மே 18) முதல் 22 வரை பஞ்சாப் மற்றும் ஹரியானாவில் வெப்ப அலை நிலவும் என இந்திய வானிலை ஆய்வு மையம் கணித்துள்ளது. அடுத்த ஐந்து முதல் ஆறு நாட்களுக்கு பஞ்சாப், ஹரியானா மற்றும் சண்டிகர் பகுதிகளில் பெரும்பாலும் வறண்ட வானிலை நீடிக்கும் என எதிர்பார்க்கப்படுகிறது.

அதிகபட்ச வெப்பநிலை படிப்படியாக 4-5°C வரை உயரும் என்றும், பஞ்சாப் மற்றும் ஹரியானாவின் தெற்கு மற்றும் தென்மேற்கு பகுதிகளில் ஆங்காங்கே வெப்ப அலை நிலைமை ஏற்படும் என்றும் கணிக்கப்பட்டுள்ளது.

பஞ்சாப், ஹரியானா மற்றும் சண்டிகரின் வடக்கு மற்றும் கிழக்கு பகுதிகளிலும் அதிகபட்ச வெப்பநிலை இயல்பை விட அதிகமாக இருக்கும்.

பஞ்சாபில் அதிகபட்சமாக பதிண்டாவில் 41.0°C வெப்பநிலை பதிவாகியுள்ளது. இருப்பினும், மாநிலம் முழுவதும் தற்போது வெப்பநிலை இயல்பை விட -1.6 முதல் -3.0°C வரை குறைவாகவே உள்ளது.

ஹரியானாவில் ரோஹ்தக்கில் அதிகபட்சமாக 40.8°C பதிவாகியுள்ளது. அங்கு வெப்பநிலை இயல்பான அளவில் உள்ளது.

இந்திய வானிலை ஆய்வு அறிவுறுத்தலின்படி, மிதமான வெப்பநிலை பொதுமக்களுக்கு தாங்கக்கூடியதாக இருந்தாலும், குழந்தைகள், முதியவர்கள் மற்றும் நாள்பட்ட நோய்களால் பாதிக்கப்பட்டவர்கள் போன்ற பாதிக்கப்படக்கூடிய பிரிவினருக்கு மிதமான உடல்நல அபாயங்கள் உள்ளன.

உச்ச வெயில் நேரங்களில் நீண்ட நேரம் வெயிலில் இருப்பதைத் தவிர்க்கவும், நீரேற்றத்துடன் இருக்கவும், இலகுவான, வெளிர் நிற தளர்வான பருத்தி ஆடைகளை அணியவும், துணி, தொப்பி அல்லது குடைகளால் தலையை மூடிக்கொள்ளவும் பொதுமக்களுக்கு அறிவுறுத்தப்பட்டுள்ளது.

Hindusthan Samachar / vidya.b