திருவனந்தபுரம் , 18 மே (ஹி.ச.)

கேரளாவில் பத்தாண்டு காலத்திற்குப் பிறகு ஐக்கிய ஜனநாயக முன்னணி (யு.டி.எஃப்) மாநிலத்தில் மீண்டும் ஆட்சிக்கு வருகின்றது.

திருவனந்தபுரம் மத்திய மைதானத்தில் இன்று காலை 10 மணிக்கு நடைபெறும் விழாவில், முழு அமைச்சரவையுடன் வி.டி. சதீசன் கேரள முதலமைச்சராக பதவியேற்க உள்ளார்.

இடதுசாரி ஜனநாயக முன்னணியின் (எல்.டி.எஃப்) பத்தாண்டு கால ஆட்சியை முடிவுக்கு கொண்டுவந்து, 2026 கேரள சட்டமன்றத் தேர்தலில் யு.டி.எஃப் பெற்ற தீர்க்கமான வெற்றியைத் தொடர்ந்து இந்த பதவியேற்பு விழா நடைபெறுகிறது.

காங்கிரஸ் ஆளும் மாநிலங்களின் முதலமைச்சர்கள் மற்றும் ராகுல் காந்தி உள்ளிட்ட பல தலைவர்கள் விழாவில் கலந்துகொள்ள வருகை தரவுள்ளதால், விமான நிலையத்தில் பாதுகாப்பு ஏற்பாடுகள் தீவிரப்படுத்தப்பட்டுள்ளன.

சதீசனுடன் பதவியேற்கும் 20 பேர் கொண்ட அமைச்சரவையில், மூத்த காங்கிரஸ் தலைவர்களான ரமேஷ் சென்னிதலா, கே. முரளிதரன் மற்றும் கே.பி.சி.சி தலைவர் சன்னி ஜோசப் ஆகியோர் இடம்பெற்றுள்ளனர். இந்திய யூனியன் முஸ்லிம் லீக்கின் (ஐ.யு.எம்.எல்) முக்கிய தலைவர்களான பி.கே. குன்ஹாலிகுட்டி, பி.கே. பஷீர், என். சம்சுதீன், கே.எம். ஷாஜி மற்றும் வி.இ. அப்துல் கஃபூர் ஆகியோரும் அமைச்சரவையில் உள்ளனர்.

மற்ற அமைச்சர்களாக மோன்ஸ் ஜோசப், ஷிபு பேபி ஜான், அனூப் ஜேக்கப், சி.பி. ஜான், ஏ.பி. அனில் குமார், டி. சித்திக், பி.சி. விஷ்ணுநாத், ரோஜி எம். ஜான், பிந்து கிருஷ்ணா, எம். லிஜு, கே.ஏ. துளசி மற்றும் ஓ.ஜே. ஜனீஷ் ஆகியோர் பெயரிடப்பட்டுள்ளனர்.

மூத்த காங்கிரஸ் தலைவர் திருவஞ்சூர் ராதாகிருஷ்ணன் சட்டப்பேரவைத் தலைவராகவும், ஷானிமோல் உஸ்மான் துணைத் தலைவராகவும் பணியாற்றுவார்கள் என்று சதீசன் அறிவித்தார். எம்.எல்.ஏ அப்பு ஜான் ஜோசப் அரசு தலைமைக் கொறடாவாக நியமிக்கப்பட்டுள்ளார்.

நேற்று அமைச்சரவையை முறையாக அறிவித்த சதீசன், லோக் பவனில் ஆளுநர் ராஜேந்திர விஷ்வநாத் ஆர்லேகரிடம் அமைச்சர்களின் பட்டியலை சமர்ப்பித்தார்.

இந்த நிலையில் பதவியேற்பு விழாவுக்கு முன்னதாக, யாக்கோபிய திருச்சபையின் மூத்த ஆயர்கள் கேரள முதலமைச்சராக நியமிக்கப்பட்டுள்ள வி.டி. சதீசனை சந்தித்து வாழ்த்து தெரிவித்தனர்.

புதிய அரசின் பதவியேற்பு விழாவுக்கான ஏற்பாடுகள் நடைபெற்று வரும் நிலையில், அவரது இல்லத்தின் முன்பு ஆதரவாளர்களும் திரண்டனர்.

Hindusthan Samachar / vidya.b