ரிஷிகேஷ், 19 மே (ஹி.ச.)

உத்தரகாண்ட் மாநிலம் ரிஷிகேஷ் பகுதியில் நள்ளிரவில் உஜ்ஜைனி எக்ஸ்பிரஸ் ரயிலின் 3 பெட்டிகள் தடம் புரண்டன. சம்பவம் நடந்த நேரத்தில் ரயில் காலியாக இருந்ததால் உயிர்சேதம் எதுவும் ஏற்படவில்லை.

ரிஷிகேஷ் ரயில் நிலையத்திலிருந்து சிறிது தூரத்தில் உள்ள காந்த் கிராமம் பகுதியில் இரவு சுமார் 9.30 மணியளவில் இந்த விபத்து ஏற்பட்டது. யோகநகரி ரயில் நிலையத்தில் இருந்து இயக்கப்படும் உஜ்ஜைனி எக்ஸ்பிரஸ் ரயிலுக்கு ஷண்டிங் பணி மேற்கொள்ளப்பட்டு வந்தபோது, திடீரென 3 பெட்டிகள் தடம் புரண்டதாக தகவல் வெளியாகியுள்ளது.

விபத்து ஏற்பட்டதும் ரயில்வே நிர்வாகம் அதிர்ச்சி அடைந்தது. தகவலறிந்து ரயில்வே அதிகாரிகள், பொறியியல் நிபுணர்கள் மற்றும் போலீசார் சம்பவ இடத்துக்கு விரைந்தனர். தடம் புரண்ட பெட்டிகளை அகற்றவும், தண்டவாளத்தை சீரமைக்கவும் விடிய விடிய பணிகள் நடைபெற்றன.

விபத்து நேரத்தில் பலத்த சத்தம் கேட்டதாக அப்பகுதி மக்கள் தெரிவித்துள்ளனர். இதனால் சுற்றுவட்டார வீடுகள் மற்றும் கடைகளில் இருந்தவர்கள் வெளியே வந்து திரண்டனர். பாதுகாப்பு காரணங்களால், ரயில்வே ஊழியர்கள் தண்டவாளத்தை ஒட்டிய பகுதியை காலி செய்து, சில நேரம் ரயில் போக்குவரத்தையும் கட்டுப்படுத்தினர்.

ஆரம்பகட்ட விசாரணையில், ஷண்டிங் பணியின் போது ஏற்பட்ட தொழில்நுட்ப கோளாறே விபத்துக்குக் காரணமாக இருக்கலாம் என கூறப்படுகிறது. எனினும், முழுமையான ஆய்வு நடைபெற்று வருவதால் அதிகாரிகள் இதுகுறித்து அதிகாரப்பூர்வமாக எந்த தகவலும் வெளியிடவில்லை.

இந்த சம்பவத்தின் வீடியோக்கள் மற்றும் புகைப்படங்கள் சமூக வலைதளங்களில் பரவி வருகின்றன.

எதிர்காலத்தில் இதுபோன்ற சம்பவங்கள் மீண்டும் நடைபெறாமல் இருக்க, முழுமையான மற்றும் பாரபட்சமற்ற விசாரணை நடத்தி பொறுப்புக்காரர்கள் மீது நடவடிக்கை எடுக்க வேண்டும் என உள்ளூர் மக்கள் கோரிக்கை விடுத்துள்ளனர்.

Hindusthan Samachar / VINOTH KUMAR P