பெய்ஜிங் , 20 மே (ஹி.ச.)

ரஷ்ய அதிபர் விளாடிமிர் விளாடிமிர் புதின் இரண்டு நாள் அரசு முறை பயணமாக சீனா வருகை தந்துள்ளார்.

சீன மக்கள் பெரும் மண்டபத்தில் அதிபர் விளாடிமிர் புதினை இன்று சீன அதிபர் ஷி ஜின்பிங் மரியாதை அணிவகுப்பு மற்றும் துப்பாக்கி குண்டுகள் முழங்க அரசு மரியாதையுடன் வரவேற்றார்.

சிறுவர்கள் சீன மற்றும் ரஷ்யக் கொடிகளை அசைத்தனர். முறையான பேச்சுவார்த்தைகளுக்குப் பிறகு, இரு தலைவர்களும் தேநீர் அருந்தியபடி தனிப்பட்ட சந்திப்பை நடத்துவார்கள் என எதிர்பார்க்கப்படுகிறது.

அமெரிக்க அதிபர் டொனால்ட் டிரம்ப் சீனத் தலைநகருக்கு விஜயம் செய்ததைத் தொடர்ந்து நடைபெறும் சீன-ரஷ்ய தலைவர்களின் இந்த உச்சிமாநாட்டின் தோற்றமும், விளைவுகளும் உன்னிப்பாகக் கவனிக்கப்படுகிறது.

சீன-ரஷ்ய உறவுகள் இந்த நிலையை எட்டியதற்குக் காரணம், நாம் அரசியல் பரஸ்பர நம்பிக்கையையும், ஒத்துழைப்பையும் ஆழப்படுத்தியதே என்று புதினுடனான சந்திப்பின் தொடக்கத்தில் ஷி கூறினார்.

மத்திய கிழக்கில் ஏற்பட்டுள்ள குழப்பங்களுக்கு மத்தியில் ரஷ்யா நம்பகமான எரிசக்தி வழங்குநராக தொடர்வதாக வலியுறுத்திய புதின், இரு நாடுகளின் உறவுகள் உலகளாவிய ஸ்திரத்தன்மையை உறுதிசெய்ய உதவுவதாகத் தெரிவித்தார்.

புதிய சகாப்தத்தில் ரஷ்யா மற்றும் சீனா இடையேயான விரிவான கூட்டாண்மை மற்றும் ஒத்துழைப்பு, நவீன உலகில் சர்வதேச உறவுகளுக்கு ஒரு எடுத்துக்காட்டு என்று புதின் ஷியிடம் கூறினார். அடுத்த ஆண்டு ரஷ்யாவுக்கு வருமாறு ஷிக்கு புதின் அழைப்பும் விடுத்தார்.

குழாய் வழி விநியோகம் மற்றும் கடல்வழி ஏற்றுமதிகள் உட்பட, ரஷ்ய எண்ணெயின் மிகப்பெரிய வாங்குநராக சீனா தொடர்கிறது.

இருப்பினும், பெய்ஜிங் சந்திப்புக்கு முன்னதாக எரிசக்தி தொடர்பான ஒப்பந்தங்களை எதிர்பார்பதாக கிரெம்ளின் சுட்டிக்காட்டியுள்ளது. புதினின் கடந்த செப்டம்பர் 2025 விஜயத்தின் போது, சைபீரியா 2 எரிவாயு குழாய் திட்டத்தை முன்னெடுக்க இரு தரப்பும் ஒப்புக்கொண்டதாக ரஷ்ய எரிவாயு நிறுவனமான காஸ்ப்ரோம் தெரிவித்திருந்தது. ஆனால், இந்தத் திட்டம் குறித்து சீனா பொதுவெளியில் மிகக் குறைவாகவே பேசியுள்ளது.

எரிவாயு விலை நிர்ணயம் போன்ற முக்கிய பிரச்சினைகள் இன்னும் தீர்க்கப்படாமல் உள்ளன, மேலும் பேச்சுவார்த்தைகள் பல ஆண்டுகள் நீடிக்கலாம். ஈரான் மோதலுடன் தொடர்புடைய எரிசக்தி விநியோகப் பற்றாக்குறை, நீண்டகால எரிவாயு ஆதாரமாக இந்தக் குழாய் திட்டத்திற்கான ரஷ்யாவின் வாதத்தை வலுப்படுத்தலாம்.

அமெரிக்காவுடனான வர்த்தக சமாதானத்தை நீட்டிக்கவும், தலா 30 பில்லியன் டாலர் அல்லது அதற்கு மேற்பட்ட பொருட்களுக்கு பரஸ்பர வரிக் குறைப்பை வலியுறுத்தவும் பெய்ஜிங் முயலும் என்று அமைச்சகம் தெரிவித்தது.

உக்ரைன் போருக்காக ரஷ்யாவைத் தண்டிக்க மேற்கத்திய நாடுகள் தடைகளை விதித்ததிலிருந்து, சீனா மற்றும் ரஷ்யா இடையேயான வரம்பற்ற கூட்டாண்மை வலுப்பெற்றுள்ளதாக உலக அரசியல் ஆர்வலர்கள் கூறுகின்றனர்.

Hindusthan Samachar / vidya.b