சிலிகுரி, 20 மே (ஹி.ச.)

மேற்கு வங்காளத்தின் டார்ஜிலிங், காலிம்பாங் உள்ளிட்ட மலைப்பகுதிகளில் தற்போது கோர்க்காலாந்து பிராந்திய நிர்வாகம் (GTA) செயல்பட்டு வருகிறது. எனினும், முழுமையான மூன்றடுக்கு பஞ்சாயத்து ராஜ் முறை இங்கு அமலில் இல்லை.

பஞ்சாயத்து அமைப்பு அறிமுகமானால், கிராம பஞ்சாயத்து, பஞ்சாயத்து சமிதி, ஜில்லா பரிஷத் என மக்களால் தேர்ந்தெடுக்கப்பட்ட உள்ளாட்சி பிரதிநிதிகள் மூலம் வளர்ச்சித் திட்டங்கள் நேரடியாக செயல்படுத்தப்படும்.

இந்த நிலையில் வடக்கு வங்காளத்தின் ஒட்டுமொத்த வளர்ச்சியை விரைவுபடுத்தும் நோக்கில், மாநில அரசு மலைப்பகுதிகளில் பஞ்சாயத்து ராஜ் அமைப்பை அறிமுகப்படுத்தவும், உள்கட்டமைப்பு வசதிகளை மேம்படுத்தவும் திட்டமிட்டுள்ளதாக மேற்கு வங்க மாநில அமைச்சர் திலீப் கோஷ் தெரிவித்தார்.

இது தொடர்பாக இன்று சிலிகுரியில் செய்தியாளர்களிடம் பேசிய அவர் கூறுகையில்,

வடக்கு வங்காளத்தின் வளர்ச்சியில் நாங்கள் கவனம் செலுத்தி வருகிறோம். மலைப்பகுதிகளில் பஞ்சாயத்து ராஜ் முறையை விரைவில் கொண்டு வருவோம். அத்துடன் சாலை, குடிநீர், சுகாதாரம், கல்வி உள்ளிட்ட அடிப்படை உள்கட்டமைப்பு வசதிகளையும் வலுப்படுத்த நடவடிக்கை எடுக்கப்படும்.

முந்தைய அரசாங்கங்களால் கவனிக்கப்படாமல் விடப்பட்ட பல்வேறு பணிகளை தற்போதைய அரசு முன்னெடுக்க உள்ளது.

மலைப்பகுதி மக்களின் நீண்டகால கோரிக்கையான உள்ளாட்சி அமைப்புகளை வலுப்படுத்துவதன் மூலம், அடிமட்ட அளவில் அதிகாரப் பரவலாக்கம் உறுதி செய்யப்படும்.

என்று திலீப் கோஷ் தெரிவித்தார்.

இந்த அறிவிப்பு, மலைப்பகுதி மக்களுக்கு அதிக நிதி, திட்டமிடல் அதிகாரம் மற்றும் வெளிப்படைத்தன்மையை வழங்கும் என எதிர்பார்க்கப்படுகிறது.

உள்கட்டமைப்பு மேம்பாட்டின் ஒரு பகுதியாக சுற்றுலா, தேயிலை, தோட்டக்கலை மற்றும் இணைப்புச் சாலைகளுக்கு முன்னுரிமை அளிக்கப்படும் எனவும் தகவல்கள் தெரிவிக்கின்றன.

இந்த திட்டத்திற்கான விரிவான செயல் திட்டம் மற்றும் கால அட்டவணை விரைவில் வெளியிடப்படும் என அரசு வட்டாரங்கள் தெரிவித்தன.

Hindusthan Samachar / vidya.b