சென்னை, 26 மே (ஹி.ச.)

அபுதாபியில் இருந்து சென்னைக்கு இன்று காலை 10.25 மணிக்கு புறப்பட திட்டமிடப்பட்டிருந்த இண்டிகோ விமானம், இயந்திர கோளாறு காரணமாக கடைசி நேரத்தில் ரத்து செய்யப்பட்டது.

விமானம் புறப்படுவதற்கு முன் மேற்கொள்ளப்பட்ட வழக்கமான தொழில்நுட்ப சோதனையின் போது இயந்திரத்தில் பழுது இருப்பது கண்டறியப்பட்டது.

பயணிகளின் பாதுகாப்பை கருத்தில் கொண்டு விமானத்தை இயக்க வேண்டாம் என விமான நிறுவனம் முடிவு செய்தது.

இந்த விமானத்தில் சென்னை திரும்ப காத்திருந்த சுமார் 180க்கும் மேற்பட்ட பயணிகள் திடீர் ரத்து அறிவிப்பால் பெரும் சிரமத்துக்கு ஆளாகினர். வேலைக்கு திரும்புவோர், மருத்துவ தேவைக்காக வருபவர்கள், குடும்பத்தினருடன் பயணிக்க இருந்தவர்கள் என பலரும் அபுதாபி விமான நிலையத்தில் தவித்தனர்.

இது தொடர்பாக இண்டிகோ நிறுவன அதிகாரிகள் கூறுகையில், பயணிகளின் பாதுகாப்பே தங்களுக்கு முதன்மையானது என்றும், தொழில்நுட்ப கோளாறு சரிசெய்யப்படும் வரை விமானத்தை இயக்க முடியாது என்றும் தெரிவித்தனர்.

பாதிக்கப்பட்ட பயணிகளுக்கு மாற்று விமானத்தில் பயண ஏற்பாடு செய்யப்பட்டு வருவதாகவும், விரும்புவோருக்கு கட்டணம் முழுமையாக திருப்பி அளிக்கப்படும் என்றும் அவர்கள் குறிப்பிட்டனர். மேலும் பயணிகளுக்கு உணவு மற்றும் தங்குமிட வசதிகளும் செய்து தரப்படுவதாக நிறுவனம் தெரிவித்துள்ளது.

வளைகுடா நாடுகளில் இருந்து தமிழகத்துக்கு வரும் முக்கிய விமான வழித்தடங்களில் அபுதாபி-சென்னை வழித்தடமும் ஒன்றாகும். தினசரி நூற்றுக்கணக்கான பயணிகள் இந்த வழித்தடத்தில் பயணிக்கின்றனர்.

கடந்த சில மாதங்களாக தொழில்நுட்ப காரணங்களால் விமானங்கள் தாமதமாவதும், ரத்தாவதும் அதிகரித்துள்ளதாக பயணிகள் வேதனை தெரிவிக்கின்றனர்.

மாற்று ஏற்பாடுகள் குறித்த கூடுதல் தகவல்களுக்கு பயணிகள் இண்டிகோ வாடிக்கையாளர் சேவை மையத்தை தொடர்பு கொள்ளலாம் என அறிவிக்கப்பட்டுள்ளது.

Hindusthan Samachar / vidya.b