குன்னூர், 27 மே (ஹி.ச.)

நீலகிரி மாவட்டத்தின் சுற்றுலா அடையாளங்களில் ஒன்றான குன்னூர் சிம்ஸ் பூங்காவில், எதிர்பார்ப்புமிக்க 66-வது பழக்கண்காட்சி இன்று கோலாகலமாக தொடங்கியது.

தோட்டக்கலைத் துறை சார்பில் ஆண்டுதோறும் நடத்தப்படும் இந்த கண்காட்சி, இன்று

(மே 27-ம் தேதி) தொடங்கி,

மே 30-ம் தேதி வரை நான்கு நாட்களுக்கு நடைபெற உள்ளது.

மலைகளின் அரசி என்று அழைக்கப்படும் நீலகிரியின் கோடை விழாவின் முக்கிய அங்கமாக இந்த பழக்கண்காட்சி கருதப்படுகிறது.

இந்த ஆண்டு கண்காட்சியில் உள்நாட்டு மற்றும் வெளிநாட்டு வகைகளைச் சேர்ந்த பல்வேறு பழங்கள் காட்சிப்படுத்தப்பட உள்ளன. சுமார் 2 லட்சத்திற்கும் மேற்பட்ட பழங்களைக் கொண்டு அலங்கரிக்கப்பட்ட வடிவமைப்புகள் பார்வையாளர்களை வெகுவாக கவரும் என எதிர்பார்க்கப்படுகிறது.

ஸ்ட்ராபெரி, பிளம்ஸ், பேரிக்காய், ஆப்பிள், ஆரஞ்சு, அவகேடோ, கிவி உள்ளிட்ட மலைப்பிரதேச பழங்களுடன், அரிய வகை பழ ரகங்களும் இடம்பெற்றுள்ளன.

மேலும், பழங்களால் உருவாக்கப்பட்ட விலங்குகள், பறவைகள் மற்றும் பாரம்பரிய கட்டிடங்களின் மாதிரிகள் கண்காட்சியின் முக்கிய ஈர்ப்பாக அமையும்.

விவசாயிகளுக்கு பழ சாகுபடி குறித்த விழிப்புணர்வு மற்றும் பயிற்சி அளிக்கும் வகையில் சிறப்பு அரங்குகளும் அமைக்கப்பட்டுள்ளன.

கோடை விடுமுறையை முன்னிட்டு, தமிழகம் மட்டுமின்றி கேரளா, கர்நாடகா உள்ளிட்ட அண்டை மாநிலங்களில் இருந்தும் ஏராளமான சுற்றுலாப் பயணிகள் வருகை தருவார்கள் என தோட்டக்கலைத் துறை அதிகாரிகள் தெரிவித்துள்ளனர்.

போக்குவரத்து நெரிசலை தவிர்க்கவும், பார்வையாளர்களின் பாதுகாப்பை உறுதி செய்யவும் சிறப்பு ஏற்பாடுகள் செய்யப்பட்டுள்ளன.

நான்கு நாட்கள் நடைபெறும் இந்த பழக்கண்காட்சி, நீலகிரியின் தோட்டக்கலை வளத்தையும், விவசாயிகளின் உழைப்பையும் உலகறியச் செய்யும் முக்கிய நிகழ்வாக அமையும் என்பதில் சந்தேகமில்லை.

Hindusthan Samachar / vidya.b