எடப்பாடி, 27 மே (ஹி.ச.)

சேலம் மாவட்டம் எடப்பாடி அருகே உள்ள பூலாம்பட்டி கதவணை நீர்மின் நிலையத்தில் அவசர பராமரிப்புப் பணிகள் மேற்கொள்ளப்படுவதையடுத்து, காவிரி ஆற்றில் திடீரென நீர் திறந்து விடப்பட்டுள்ளது.

இதன் காரணமாக, ஆற்றின் குறுக்கே இயக்கப்பட்டு வந்த விசைப்படகு போக்குவரத்து சேவை முற்றிலுமாக நிறுத்தப்பட்டுள்ளது. மேலும், இப்பகுதியில் இருந்து மேற்கொள்ளப்பட்டு வந்த குடிநீர் விநியோகமும் தற்காலிகமாக நிறுத்தி வைக்கப்பட்டுள்ளதாக மின்வாரிய அதிகாரிகள் தெரிவித்தனர்.

பூலாம்பட்டி கதவணை நீர்மின் நிலையத்தின் முக்கிய இயந்திரங்களில் திடீர் தொழில்நுட்பக் கோளாறு ஏற்பட்டுள்ளதாகக் கூறப்படுகிறது. இதனை சரிசெய்யும் பொருட்டு, அணையின் நீர்மட்டத்தை குறைக்க வேண்டிய கட்டாயம் ஏற்பட்டுள்ளது.

அதன்படி, இன்று அதிகாலை முதல் காவிரி ஆற்றில் வினாடிக்கு 2,000 கன அடி வீதம் உபரி நீர் திறக்கப்பட்டு வருகிறது. பராமரிப்புப் பணிகள் முடிவடையும் வரை நீர் திறப்பு தொடரும் என எதிர்பார்க்கப்படுகிறது.

பூலாம்பட்டி - நெருஞ்சிப்பேட்டை இடையே காவிரி ஆற்றின் குறுக்கே இயக்கப்பட்டு வரும் விசைப்படகு சேவையே, இரு கரையோர கிராம மக்களின் முக்கிய போக்குவரத்தாக உள்ளது. தினசரி நூற்றுக்கணக்கான விவசாயிகள், பள்ளி மாணவர்கள், வியாபாரிகள் இந்த படகு சேவையை நம்பியுள்ளனர்.

தற்போது ஆற்றில் நீர்வரத்து அதிகரித்துள்ளதால், பாதுகாப்பு கருதி விசைப்படகு சேவை முழுமையாக நிறுத்தப்பட்டுள்ளது. இதனால், சுமார் 15 கி.மீ சுற்றி செல்ல வேண்டிய நிலைக்கு பொதுமக்கள் தள்ளப்பட்டுள்ளனர்.

பூலாம்பட்டி கதவணையை ஆதாரமாகக் கொண்டு எடப்பாடி, கொங்கணாபுரம், மகுடஞ்சாவடி உள்ளிட்ட 20-க்கும் மேற்பட்ட கிராமங்களுக்கு கூட்டுக் குடிநீர் திட்டத்தின் கீழ் குடிநீர் விநியோகம் செய்யப்பட்டு வருகிறது. அணையில் பராமரிப்புப் பணி நடைபெறுவதால், நீர் உந்து நிலையங்களில் இருந்து தண்ணீர் எடுப்பது தற்காலிகமாக நிறுத்தப்பட்டுள்ளது.

இதனால், அடுத்த 2 முதல் 3 நாட்களுக்கு குடிநீர் விநியோகத்தில் தடை ஏற்படும் என குடிநீர் வடிகால் வாரியம் அறிவித்துள்ளது. மாற்று ஏற்பாடாக லாரிகள் மூலம் குடிநீர் வழங்க நடவடிக்கை எடுக்கப்பட்டுள்ளதாகவும் அதிகாரிகள் கூறினர்.

இதுகுறித்து மின்வாரிய செயற்பொறியாளர் கூறுகையில், மின் உற்பத்தியை தடையின்றி தொடர பராமரிப்பு பணி அவசியம். பொதுமக்களுக்கு ஏற்படும் சிரமத்தை தவிர்க்க, பணிகளை விரைந்து முடிக்க நடவடிக்கை எடுத்துள்ளோம். 48 மணி நேரத்திற்குள் பணிகள் நிறைவடைந்து, விசைப்படகு சேவை மற்றும் குடிநீர் விநியோகம் சீராகும் என்றார்.

ஆற்றில் நீர்வரத்து அதிகமாக உள்ளதால், கரையோர மக்கள் பாதுகாப்பாக இருக்கும்படியும், ஆற்றில் இறங்கவோ, குளிக்கவோ வேண்டாம் எனவும் மாவட்ட நிர்வாகம் எச்சரிக்கை விடுத்துள்ளது.

Hindusthan Samachar / vidya.b