திருநெல்வேலி, 27 மே (ஹி.ச)

நெல்லை மாவட்டத்தின் முக்கிய நீராதாரங்களான மணிமுத்தாறு, பாபநாசம் மற்றும் சேர்வலாறு என தாமிரபரணி படுகையில் அமைந்துள்ள இந்த அணைகள் மாவட்டத்தின் குடிநீர் மற்றும் பாசனத் தேவைகளை பூர்த்தி செய்யும் முக்கிய ஆதாரங்களாக விளங்குகின்றன.

இன்று காலை நிலவரப்படி மொத்தம் 118 அடி கொள்ளளவு கொண்ட மணிமுத்தாறு அணையில் தற்போது 70.64 அடி நீர் இருப்பு உள்ளது. அணைக்கு வினாடிக்கு 92.59 கன அடி நீர் வந்து கொண்டிருக்கும் நிலையில், பாசனம் மற்றும் குடிநீர் தேவைக்காக வினாடிக்கு 345 கன அடி நீர் திறந்துவிடப்படுகிறது.

நீர்வரத்தைக் காட்டிலும் நீர் திறப்பு கணிசமாக அதிகமாக இருப்பதால், அணையின் நீர்மட்டம் படிப்படியாக குறையும் நிலை உள்ளது.

அதேபோல, 143 அடி உயரம் கொண்ட பாபநாசம் அணையின் நீர்மட்டம் தற்போது 44.80 அடியாக உள்ளது. இந்த அணைக்கு வினாடிக்கு 114 கன அடி நீர் வந்து கொண்டிருக்க, பாசனத்திற்காக வினாடிக்கு 100 கன அடி நீர் வெளியேற்றப்படுகிறது. நீர்வரத்து, நீர் திறப்பை விட சற்று அதிகமாக இருப்பதால் நீர்மட்டத்தில் சிறிய அளவில் உயர்வு ஏற்பட வாய்ப்புள்ளது.

156 அடி கொள்ளளவு கொண்ட சேர்வலாறு அணையில் 57.64 அடி நீர் தேங்கியுள்ளது. மேற்குத் தொடர்ச்சி மலைப் பகுதியில் போதிய மழை இல்லாத காரணத்தால், அணைக்கு தற்போது நீர்வரத்து முற்றிலுமாக நின்றுள்ளது. மேலும், அணையில் இருந்து நீர் திறப்பும் மேற்கொள்ளப்படவில்லை.

மணிமுத்தாறு அணையில் இருந்து அதிகளவு நீர் திறக்கப்படுவதால், தாமிரபரணி ஆற்றின் கரையோரம் வசிக்கும் மக்கள் பாதுகாப்பாக இருக்குமாறு பொதுப்பணித்துறை அதிகாரிகள் எச்சரிக்கை விடுத்துள்ளனர்.

மேற்குத் தொடர்ச்சி மலைப் பகுதியில் அடுத்த சில நாட்களுக்கு மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளதால், அணைகளுக்கு மேலும் நீர்வரத்து அதிகரித்து நீர்மட்டம் உயரும் என எதிர்பார்க்கப்படுகிறது.

Hindusthan Samachar / vidya.b