ஆந்திரா, 29 மே (ஹி.ச.)

ஆந்திரப் பிரதேசத்தில் கடந்த ஒய்எஸ்ஆர்சிபி ஆட்சிக்காலத்தில் நடைபெற்றதாக கூறப்படும் பல கோடி ரூபாய் மதிப்பிலான மதுபான ஊழல் வழக்கில் விசாரணை தீவிரமடைந்துள்ளது.

இந்த வழக்கை விசாரித்து வரும் சிறப்பு விசாரணைக் குழு (SIT), முன்னாள் முதலமைச்சர் Y. S. ஜெகன் மோகன் ரெட்டியின் முன்னாள் தனிப்பட்ட உதவியாளர் கே. நாகேஸ்வர ரெட்டி (KNR) வீட்டில் வியாழக்கிழமை அதிரடி சோதனை நடத்தியது.

இந்த சோதனையின் போது, கே.என்.ஆர் மற்றும் அவரது குடும்பத்தினரின் பெயரில் பதிவு செய்யப்பட்டிருந்த பல்வேறு சொத்துகள் தொடர்பான ஆவணங்களை அதிகாரிகள் கைப்பற்றியதாக தகவல் வெளியாகியுள்ளது.

மேலும், அவருடன் தொடர்புடைய பிற நபர்களின் சொத்து விவரங்களும் அதிகாரிகளின் கவனத்திற்கு வந்துள்ளதாக கூறப்படுகிறது.

இதற்கு முன்பு, விஜயவாடாவில் உள்ள எஸ்ஐடி அலுவலகத்தில் கே.என்.ஆர்-யிடம் தொடர்ந்து இரண்டாவது நாளாக விசாரணை நடத்தப்பட்டது.

சுமார் 6 மணி நேரத்திற்கும் மேலாக அதிகாரிகள் அவரிடம் தீவிரமாக விசாரணை மேற்கொண்டனர்.

முதல் நாள் விசாரணையிலேயே, மதுபான ஒதுக்கீடு மற்றும் விற்பனை தொடர்பாக பெரிய அளவிலான முறைகேடுகள் நடந்ததற்கான முக்கிய தகவல்கள் கிடைத்ததாக போலீஸ் தரப்பில் தெரிவிக்கப்பட்டுள்ளது.

குறிப்பாக, மதுபான சிண்டிகேட் மற்றும் முன்னாள் முதலமைச்சர் இடையேயான முக்கிய இணைப்பாளராக கே.என்.ஆர் செயல்பட்டதாக விசாரணை அதிகாரிகள் சந்தேகிப்பதாக கூறப்படுகிறது.

இதேவேளை, இந்த வழக்கில் தொடர்புடையதாக கூறப்படும் ஒய்எஸ்ஆர்சிபி நிர்வாகி பி. சிவசங்கர் ரெட்டிக்கும் எஸ்ஐடி நோட்டீஸ் அனுப்பியுள்ளது. வெள்ளிக்கிழமை விசாரணைக்கு ஆஜராகுமாறு அவருக்கு உத்தரவிடப்பட்டுள்ளதாக தகவல் வெளியாகியுள்ளது.

ஆந்திர அரசியலில் பெரும் பரபரப்பை ஏற்படுத்தியுள்ள இந்த வழக்கில், மேலும் பல முக்கிய அரசியல் பிரமுகர்கள் மற்றும் தொழிலதிபர்கள் மீது விசாரணை வளையம் விரியக்கூடும் என அரசியல் வட்டாரங்களில் பேசப்படுகிறது.

Hindusthan Samachar / VINOTH KUMAR P