ராமநாதபுரம், 03 மே (ஹி.ச.)

தொடர் விடுமுறையை முன்னிட்டு ராமேஸ்வரத்தில் உள்ள ராமநாதசுவாமி திருக்கோவில் பகுதியில் பக்தர்கள் கூட்டம் அதிகரித்துள்ளது.

வழக்கமாகவே தினமும் தமிழகத்தின் பல்வேறு மாவட்டங்களிலிருந்தும், அண்டை மாநிலங்களிலிருந்தும் நூற்றுக்கணக்கான பக்தர்கள் இந்த திருத்தலத்திற்கு வருவது வழக்கம். ஆனால் தற்போது கோடை விடுமுறை மற்றும் தொடர்ச்சியான விடுமுறை நாட்கள் காரணமாக, பக்தர்களின் வருகை பல மடங்கு உயர்ந்துள்ளது.

காலை முதலே கோயில் வளாகம் மற்றும் அதன் சுற்றுப்புற பகுதிகள் பக்தர்களால் நிரம்பியிருந்தன. தூரத்தூரமாக இருந்து குடும்பத்துடன் வந்த பக்தர்கள் முதலில் அக்னி தீர்த்த கடற்கரையில் புனித நீராடி, பின்னர் கோயிலுக்குள் உள்ள 22 புண்ணிய தீர்த்தங்களில் முறையாக நீராடி வழிபாடு செய்து வருகின்றனர்.

இந்த தீர்த்தங்களில் நீராடுவது ஆன்மீக ரீதியாக மிகுந்த முக்கியத்துவம் வாய்ந்ததாக கருதப்படுவதால், பக்தர்கள் மிகுந்த பக்தியுடன் அவற்றை கடைப்பிடித்து வருகின்றனர்.

அதனைத் தொடர்ந்து, சுவாமி மற்றும் அம்பாளை தரிசனம் செய்ய கோயிலுக்குள் நீண்ட வரிசையில் பக்தர்கள் காத்திருக்கின்றனர். சில நேரங்களில் பல மணி நேரம் காத்திருந்து தான் தரிசனம் கிடைக்கும் நிலை உருவாகியுள்ளது. இருப்பினும் பக்தர்கள் எந்த சிரமத்தையும் பொருட்படுத்தாமல் அமைதியாக வரிசையில் நின்று சாமி தரிசனம் செய்து வருகின்றனர்.

இந்த அதிகமான கூட்ட நெரிசலை கருத்தில் கொண்டு, பாதுகாப்பு ஏற்பாடுகளும் பலப்படுத்தப்பட்டுள்ளன. கோயில் வளாகம் முழுவதும் போலீசார் மற்றும் பாதுகாப்பு பணியாளர்கள் கண்காணிப்பில் ஈடுபட்டு வருகின்றனர். குறிப்பாக கூட்டத்தை பயன்படுத்தி திருட்டு போன்ற குற்றச்செயல்கள் நடைபெறாமல் இருக்க தீவிரமாக கண்காணிப்பு மேற்கொள்ளப்படுகிறது. மேலும் பக்தர்கள் ஒழுங்காக நகர உதவும் வகையில் கட்டுப்பாட்டு ஏற்பாடுகளும் செய்யப்பட்டுள்ளன.

இந்த நிலையில், ராமேஸ்வரம் நகரமே பக்தர்களின் வருகையால் சுறுசுறுப்பாக மாறியுள்ளது. ஹோட்டல்கள், தங்கும் இடங்கள், போக்குவரத்து வசதிகள் அனைத்தும் முழு பரபரப்புடன் இயங்கி வருகின்றன.

தொடர்ந்து விடுமுறை நாட்கள் இருப்பதால், இன்னும் சில நாட்களுக்கு பக்தர்கள் வருகை அதிகமாகவே இருக்கும் என எதிர்பார்க்கப்படுகிறது.

Hindusthan Samachar / ANANDHAN