கொல்கத்தா, 03 மே (ஹி.ச.)

மேற்கு வங்க மாநில சட்டப்பேரவைத் தேர்தலில் பரபரப்பை ஏற்படுத்தும் வகையில், தெற்கு 24 பர்கானாஸ் மாவட்டத்திலுள்ள ஃபால்ட்டா சட்டப்பேரவைத் தொகுதியில் நடைபெற்ற தேர்தலை இந்திய தேர்தல் ஆணையம் ரத்து செய்துள்ளது.

வாக்குப்பதிவின் போது பரவலான வன்முறை, வாக்காளர்கள் அச்சுறுத்தப்பட்டதாகக் கூறப்படும் சம்பவங்கள், தேர்தல் முறைகேடுகள் மற்றும் ஜனநாயக நடைமுறைகள் பாதிக்கப்பட்டதாக எழுந்த கடுமையான குற்றச்சாட்டுகளைத் தொடர்ந்து இந்த முக்கிய நடவடிக்கை எடுக்கப்பட்டுள்ளது.

கடந்த ஏப்ரல் 29ஆம் தேதி ஃபால்ட்டா தொகுதியில் வாக்குப்பதிவு நடைபெற்றது.

ஆனால், பல்வேறு வாக்குச்சாவடிகளில் தேர்தல் விதிமீறல்கள் நடந்ததாக அரசியல் கட்சிகள் மற்றும் வாக்காளர்கள் தரப்பில் புகார்கள் அளிக்கப்பட்டன.

மின்னணு வாக்குப் பதிவு இயந்திரங்கள் தொடர்பான சந்தேகங்களும் எழுந்தன.

இந்த புகார்களை ஆய்வு செய்த தேர்தல் ஆணையம், ஃபால்ட்டா தொகுதியில் நடைபெற்ற வாக்குப்பதிவு சுதந்திரமான மற்றும் நியாயமான தேர்தலின் அடிப்படை நோக்கத்துக்கு எதிரானது என்று கருதியுள்ளது.

இதையடுத்து, தொகுதியில் உள்ள அனைத்து 285 வாக்குச்சாவடிகளிலும், துணை வாக்குச்சாவடிகள் உட்பட, மே 21ஆம் தேதி மறு வாக்குப்பதிவு நடத்த உத்தரவிடப்பட்டுள்ளது.

அன்றைய தினம் காலை 7 மணி முதல் மாலை 6 மணி வரை வாக்குப்பதிவு நடைபெறும்.

மறு வாக்குப்பதிவில் பதிவாகும் வாக்குகள் மே 24ஆம் தேதி எண்ணப்பட்டு, அதன்பிறகு முடிவுகள் அறிவிக்கப்படும் என தேர்தல் ஆணையம் தெரிவித்துள்ளது.

ஒரு முழு சட்டப்பேரவைத் தொகுதிக்கே மறு வாக்குப்பதிவு அறிவிக்கப்படுவது மிகவும் அரிதான சம்பவமாகும்.

தேர்தல் முறைகேடுகள் தொடர்பாக தேர்தல் ஆணையம் எவ்வளவு கடுமையான நிலைப்பாட்டை எடுத்துள்ளது என்பதை இந்த நடவடிக்கை தெளிவுபடுத்துகிறது.

ஃபால்ட்டா தொகுதியில் நடைபெறவுள்ள மறு வாக்குப்பதிவு, மேற்கு வங்க தேர்தல் அரசியல் சூழலில் மேலும் பரபரப்பை ஏற்படுத்தியுள்ளது.

Hindusthan Samachar / VINOTH KUMAR P