திருப்பதி , 31 மே (ஹி.ச.)

திருமலையை மாசு இல்லாத புனித தலமாக மாற்றும் முயற்சியின் ஒரு பகுதியாக, தொழிலதிபர் நீரா ராடியா, திருமலை திருப்பதி தேவஸ்தானத்திற்கு (டி.டி.டி.) ரூ.1.13 கோடி மதிப்பிலான அதிநவீன மின்சார பேருந்தை நன்கொடையாக வழங்கினார்.

மேலும், சுமார் ரூ.20 லட்சம் மதிப்புள்ள 15 டேப்லெட்களையும் அவர் வழங்கினார்.

இந்த நன்கொடைகள், சுற்றுச்சூழலுக்கு உகந்த திட்டங்களை விரிவுபடுத்த டி.டி.டி.க்கு உதவும் என்று அதிகாரிகள் தெரிவித்தனர்.

புதிய மின்சார பேருந்துக்கு இன்று திருமலை ஸ்ரீவாரி கோவில் முன்பு சிறப்பு பூஜைகள் நடத்தப்பட்டன.

பின்னர், பேருந்தின் சாவியை நீரா ராடியா, டி.டி.டி. தலைவர் பி.ஆர். நாயுடு மற்றும் கூடுதல் செயல் அலுவலர் வெங்கையா சவுதரியிடம் ஒப்படைத்தார்.

நிகழ்ச்சியில் பேசிய டி.டி.டி. தலைவர் பி.ஆர். நாயுடு, நீரா ராடியாவின் தாராள நன்கொடைக்கு நன்றி தெரிவித்தார்.

பக்தர்களுக்காக திருமலையில் இயக்கப்பட்டு வரும் இலவச தர்மரதம் சேவையில் இந்த புதிய மின்சார பேருந்து இணைக்கப்படும் என்றும் அவர் கூறினார்.

தற்போது தர்மரதம் சேவையில் 20 பேருந்துகள் இயக்கப்பட்டு வருகின்றன. அவற்றில் 14 பேருந்துகள் ஏற்கனவே மின்சார பேருந்துகளாக உள்ளன.

இந்த பேருந்துகள் 21 நிறுத்தங்கள் வழியாக தினமும் 380 பயணங்களை மேற்கொண்டு, பக்தர்களுக்கு இலவச போக்குவரத்து வசதியை வழங்கி வருகின்றன.

விரைவில் மீதமுள்ள டீசல் பேருந்துகளையும் மின்சார பேருந்துகளாக மாற்ற திட்டமிடப்பட்டுள்ளதாகவும், நீரா ராடியாவின் இந்த நன்கொடை அந்த இலக்கை எட்டுவதற்கு மேலும் ஊக்கமளிப்பதாகவும் டி.டி.டி. நிர்வாகம் தெரிவித்துள்ளது.

Hindusthan Samachar / M.DEEPAK RAJA