சென்னை, 31 மே (ஹி.ச.)

உலக புகையிலை எதிர்ப்பு தினத்தை முன்னிட்டு, புகையிலைப் பொருட்களின் தீமைகள் மற்றும் புற்றுநோய் பாதிப்புகள் குறித்து பொதுமக்களிடையே விழிப்புணர்வு ஏற்படுத்தும் வகையில் திருச்சியில் சிறப்பு சைக்கிள் பேரணி நடைபெற்றது.

இந்த விழிப்புணர்வு பேரணியை முன்னாள் அமைச்சரும், திருச்சி மாவட்டத்தின் முக்கிய அரசியல் தலைவர்களில் ஒருவருமான கே.என்.நேரு தொடங்கி வைத்தார்.

திருச்சி மத்திய பேருந்து நிலையத்தில் நடைபெற்ற நிகழ்ச்சியில் கலந்து கொண்ட அவர், பேரணியை கொடியசைத்து தொடங்கி வைத்ததுடன், அதில் பங்கேற்ற இளைஞர்களுக்கு தனது வாழ்த்துகளையும் தெரிவித்தார்.

திருச்சி மத்திய பேருந்து நிலையத்திலிருந்து தொடங்கிய இந்த சைக்கிள் பேரணி, திருவெறும்பூர் வரை பல்வேறு பகுதிகள் வழியாகச் சென்று பொதுமக்களிடையே விழிப்புணர்வு ஏற்படுத்தும் வகையில் நடத்தப்படுகிறது.

இந்த பேரணியில் பங்கேற்ற இளைஞர்கள், பொதுமக்களுக்கு துண்டுப் பிரசுரங்கள் வழங்கி புகையிலைப் பொருட்கள் மற்றும் போதைப் பழக்கங்களால் ஏற்படும் உடல்நல பாதிப்புகள் குறித்து எடுத்துரைக்க உள்ளனர்.

குறிப்பாக, புகைப்பிடித்தல் மற்றும் புகையிலைப் பயன்பாடு புற்றுநோய் உள்ளிட்ட பல்வேறு கடுமையான நோய்களுக்கு காரணமாக இருப்பதையும், அதனால் ஏற்படும் சமூக மற்றும் குடும்ப பாதிப்புகளையும் விளக்கும் நடவடிக்கைகள் மேற்கொள்ளப்படுகின்றன.

இதுகுறித்து தனது எக்ஸ் தளப் பதிவில் கருத்து தெரிவித்த கே.என்.நேரு,

புகையிலை மற்றும் போதைப் பொருட்கள் மனிதனின் உடல்நலத்தையும் எதிர்காலத்தையும் பாதிக்கும்.

போதையின் பாதை என்றுமே தீங்கை மட்டுமே தரும் என்பதை உணர்ந்து, நாம் ஒவ்வொருவரும் சமூகத்தில் விழிப்புணர்வு ஏற்படுத்த முன்வர வேண்டும் என்று குறிப்பிட்டுள்ளார்.

புகையிலை இல்லாத, ஆரோக்கியமான சமூகத்தை உருவாக்க அனைவரும் இணைந்து செயல்பட வேண்டும் என்பதையும் அவர் வலியுறுத்தியுள்ளார்.

Hindusthan Samachar / P YUVARAJ