புதுடெல்லி , 04 மே (ஹி.ச.)

தமிழக சட்டசபை தேர்தல் முடிவுகள் வெளியாகி வரும் நிலையில், அரசியல் வியூக நிபுணர் பிரசாந்த் கிஷோர் கடந்த காலத்தில் கூறிய கணிப்பு தற்போது உண்மையாகி வருவது அரசியல் வட்டாரங்களில் பரபரப்பை ஏற்படுத்தியுள்ளது.

நடிகர் விஜய் தொடங்கிய ‘தமிழக வெற்றி கழகம்’ (டிவிகே) கட்சி தனித்து போட்டியிட்டால் ஆட்சியை பிடிக்கும் வாய்ப்பு இருப்பதாக அவர் கூறியிருந்த வீடியோ தற்போது சமூக வலைத்தளங்களில் வைரலாக பரவி வருகிறது.

தமிழகத்தில் 234 தொகுதிகளிலும் தனித்து போட்டியிட்ட டிவிகே, தற்போது வெளியாகி வரும் தேர்தல் முடிவுகளில் 100-க்கும் மேற்பட்ட தொகுதிகளில் முன்னிலை வகித்து வருகிறது.

இதனால் திமுக மற்றும் அ.தி.மு.க. கூட்டணிகளுக்கு எதிர்பாராத அதிர்ச்சி ஏற்பட்டுள்ளதாக அரசியல் விமர்சகர்கள் கூறுகின்றனர்.

சில மாதங்களுக்கு முன்பு தனியார் தொலைக்காட்சிக்கு அளித்த பேட்டியில், விஜய் கட்சியின் எதிர்காலம் குறித்து பிரசாந்த் கிஷோர் தன்னம்பிக்கையுடன் பேசியிருந்தார்.

அப்போது, “விஜய் கட்சி அ.தி.மு.க.வுடன் கூட்டணி அமைக்குமா?” என்ற கேள்விக்கு பதிலளித்த அவர்,

அதற்கு வாய்ப்பே இல்லை. டிவிகே தனித்தே போட்டியிடும். அப்படி போட்டியிட்டால் தமிழகத்தில் வெற்றி பெற மிகப்பெரிய வாய்ப்பு உள்ளது என்று தெரிவித்தார்.

இதைத்தொடர்ந்து,

18 இடங்களை கைப்பற்றி ஆட்சி அமைக்க முடியுமா?என்று நிகழ்ச்சி தொகுப்பாளர் கேள்வி எழுப்பியபோது,

நிச்சயமாக முடியும். இந்த வீடியோவை சேமித்து வைத்துக்கொள்ளுங்கள்.

தேர்தல் முடிவுகள் வரும் நாளில் மீண்டும் பாருங்கள் என்று பிரசாந்த் கிஷோர் பதிலளித்திருந்தார்.

தற்போது த.வெ.க 100-க்கும் மேற்பட்ட தொகுதிகளில் முன்னிலை வகித்து வருவதால், அந்த பேட்டி வீடியோவை விஜய் ஆதரவாளர்கள் சமூக வலைத்தளங்களில் அதிக அளவில் பகிர்ந்து வருகின்றனர்.

நடிகர் விஜய் தனது அரசியல் பயணத்திற்காக பிரசாந்த் கிஷோரை சிறப்பு அரசியல் ஆலோசகராக நியமித்திருந்தார்.

அவரது ஆலோசனையின் பேரிலேயே டிவிகே, திமுக அல்லது அ.தி.மு.க. கூட்டணிகளில் இணையாமல் தனித்து போட்டியிட்டது குறிப்பிடத்தக்கது.

தற்போதைய தேர்தல் நிலவரங்கள், பிரசாந்த் கிஷோரின் அரசியல் வியூகமும், விஜயின் மக்கள் ஆதரவும் இணைந்து தமிழக அரசியலில் புதிய மாற்றத்தை ஏற்படுத்தியுள்ளதாக அரசியல் பார்வையாளர்கள் கருத்து தெரிவித்து வருகின்றனர்.

Hindusthan Samachar / M.DEEPAK RAJA