சென்னை, 06 மே (ஹி.ச.)

தவெக தலைவர் விஜய் ஆட்சி அமைக்க காங்கிரஸ் கட்சி ஆதரவு அளிக்க முடிவு செய்துள்ளதாகத் தகவல் வெளியாகியுள்ளது.

விஜய்க்கு ஆதரவு அளிப்பது குறித்து தமிழக காங்கிரஸ் கட்சி சார்பில் நேற்று ஆலோசனை நடைபெற்றது.

இந்த ஆலோசனைக் கூட்டத்தில் தவெகவுக்கு ஆதரவு அளிப்பது குறித்து அக்கட்சியின் தேசிய தலைமைக்கு அதிகாரம் அளித்து தீர்மானம் நிறைவேற்றப்பட்டது.

இந்த நிலையில் தமிழ்நாடு காங்கிரஸ் கமிட்டி தலைமையகமான சென்னை சத்தியமூர்த்தி பவனில் இன்று காலை 11:00 மணிக்கு நடைபெறுவதாக அறிவிக்கப்பட்டிருந்த செய்தியாளர்கள் சந்திப்பு திடீரென ஒத்திவைக்கப்பட்டுள்ளது.

அக்கட்சி வட்டாரங்கள் தெரிவித்த தகவலின்படி,

தமிழக வெற்றிக் கழகத்துக்கு காங்கிரஸ் கட்சி ஆதரவு அளிப்பது தொடர்பான முக்கிய அறிவிப்பை வெளியிடும் பொருட்டு இந்த சந்திப்பு ஏற்பாடு செய்யப்பட்டிருந்தது.

இந்நிலையில், இன்று காலை நிகழ்வு ரத்து செய்யப்பட்டு, அதற்கு பதிலாக இன்று மதியம் 2:00 மணிக்கு அகில இந்திய காங்கிரஸ் கமிட்டி பொறுப்பாளர் கிரிஷ் சோடங்கர் செய்தியாளர்களை சந்தித்து பேச உள்ளதாக தகவல் வெளியாகியுள்ளது.

தமிழக வெற்றிக் கழகத்துடனான கூட்டணி குறித்து கடந்த சில நாட்களாக அரசியல் வட்டாரத்தில் பரபரப்பாக பேசப்பட்டு வந்தது.

இதுதொடர்பான உத்தியோகபூர்வ நிலைப்பாட்டை காங்கிரஸ் மேலிட பொறுப்பாளர் கிரிஷ் சோடங்கர் இன்றைய சந்திப்பில் தெளிவுபடுத்துவார் என எதிர்பார்க்கப்படுகிறது.

காலை சந்திப்பு ஒத்திவைக்கப்பட்டதற்கான காரணம் குறித்து கட்சி தரப்பில் இதுவரை அதிகாரப்பூர்வ விளக்கம் அளிக்கப்படவில்லை.

மதியம் நடைபெறும் சந்திப்பில் கூட்டணி, தொகுதி பங்கீடு உள்ளிட்ட முக்கிய அம்சங்கள் குறித்து அறிவிப்பு வெளியாகலாம் என அரசியல் விமர்சகர்கள் கருதுகின்றனர்.

Hindusthan Samachar / vidya.b